2017/09/25 Улаанбаатар
2017 оны 06 сарын 23

Торгоны зам ба эртний нийслэл Хархорум хот, нүүдэлчдийн түүх, зан заншил, өв соёлыг олон улсын аялал жуулчлалын төв болгон хөгжүүлэх, нүүдэлчдийн өв соёлыг соёл урлаг, уугуул нутгийн иргэдийн уламжлалт зан заншлаар дамжуулан сурталчлах зорилгоор “Торгоны зам-Хархорин” соёл, жуулчлалын арга хэмжээг ирэх сарын 17-21-нд зохион байгуулах юм байна.

ЮНЕСКО”-гийн Торгоны замын хөтөлбөрийн албан ёсны газрын зурагт Монгол Улс Хархорин хотоор холбогдсон байдаг. Хархорин нь Монголын эзэнт гүрний үед Өрнө, Дорнын худалдаа төвлөрсөн, татвар төлөгчид, элч төлөөлөгчдийн дамжин өнгөрдөг гол суваг болж байсан учир гарцаагүй Торгоны замын хотуудын нэг гэж судлаач түүхчид үздэг.


Монгол Улсын төдийгүй хүн төрөлхтний хосгүй үнэт өвд бүртгэгдсэн Эзэнт гүрний нийслэл Хархорум хот, Чингис хааны алтан ургийн хаад байгуулан өнөөдрийг хүртэл үнэт чанараа хадгалан ирсэн цөөн дурсгалын нэг болох Эрдэнэ-Зуу хийдийн үнэт өвийг урлаг, соёл, уламжлалт зан үйлийн өв соёлоор уламжлуулан сурталчилж жуулчдын тоог нэмэгдүүлэн цаашид хөрш зэргэлдээ орнууд, дэлхийн бусад орнуудын жуулчдын зорин ирж оролцдог соёл, аялал жуулчлалын томоохон арга хэмжээ болгох эхний алхам энэ юм.


Энэ хүрээнд Торгоны Зам-Хархорум хот, түүх өв соёлын олон улсын эрдэм шинжилгээний бага хурал болон гадаад, дотоодын зочдод Монголын түүх, урлаг, соёл, ахуй амьдралыг таниулан сурталчилсан “Их хаадын удам” соёл, урлагийн арга хэмжээ, “Хосгүй үнэт бүтээлийн үзэсгэлэн”, “Хархорум зоог” Монгол үндэсний хоолны фестиваль, “Нүүдэлчин монгол”, “Цамын дэг” шашин соёлын арга хэмжээ, “Адуучин” соёлын үйл ажиллагаа, Хархорумын худалдааны гудамж, Циркийн болон морьтон баатруудын тоглолт зэрэг танин мэдэхүйн боловсролд чиглэсэн сонирхолтой, өвөрмөц хөтөлбөр багтжээ.


Тус соёлын арга хэмжээг Өвөрхангай аймгийн Хархорин суманд Засгийн газрын хэрэгжүүлэгч агентлаг Соёл урлагийн газрын дэмжлэгтэй Өвөрхангай аймгийн ЗДТГ, Хархорин сумын ЗДТГ хамтран зохион байгуулах юм.

Сэтгэгдэл