Банкуудын ногоон санхүүжилтийн туршлагаас Киргиз улс суралцана

2024 оны 2 дугаар сарын 28,
Бишкек хот

Монгол Улсын Их Хурлын дарга Г.Занданшатарын Бүгд Найрамдах Киргиз Улсад хийсэн айлчлалын үеэр Монголын банкны холбоо, Монголын Тогтвортой санхүүжилтийн холбоо болон Киргизийн банкны холбоо нь тогтвортой санхүүжилтийн чиглэлээр хамтран ажиллах, харилцан туршлага солилцох зорилготой гуравласан санамж бичгийг байгууллаа.

Санамж бичгийн хүрээнд, Монгол, Киргиз хоёр улсын банкны холбоод, Монгол Улсын Тогтвортой санхүүжилтийн холбоо, гишүүн байгууллагуудын үр дүнтэй харилцаа, хамтын ажиллагаагаар дамжуулан хоёр улсын хэмжээнд тогтвортой санхүүжилтийн мэдлэг, туршлага хуваалцах ажлуудыг хэрэгжүүлэх юм.

Ингэхдээ Киргизийн банкны холбоо нь Монгол Улсад үндэсний хэмжээний ногоон санхүүжилтийн тогтолцоог бүрдүүлэх зорилгоор байгуулсан Монголын ногоон санхүүгийн корпорацыг байгуулсан туршлага, Монголын Санхүүгийн тогтвортой байдлын зөвлөлөөс өнгөрсөн 2022 онд баталсан “Тогтвортой санхүүгийн үндэсний замын зураг”, байгаль орчинд ээлтэй үйл ажиллагааны шалгуур үзүүлэлт болох “Монгол Улсын ногоон таксономи” баримт бичгийг судлан, нутагшуулахыг зорьж байна. Мөн санамж бичгийн хүрээнд хоёр талын банк, санхүүгийн байгууллагуудад нэвтрүүлж, хэрэгжүүлсэн тогтвортой санхүүгийн зарчим, заавар, арга хэрэгсэл, сургалтуудын талаар мэдлэг, туршлагаа хуваалцах, хоёр орны ногоон финтекийн хөгжлийг дэмжих боломжийг хамтран судалж, хэрэгжүүлнэ.

КИРГИЗИЙН БАНКНЫ ХОЛБОО

Бүгд Найрамдах Киргиз Улсын нутаг дэвсгэрт үйл ажиллагаа явуулах албан ёсны зөвшөөрөлтэй арилжааны банкнууд, төрөлжсөн санхүү, зээлийн байгууллагууд, түүнчлэн олон улсын байгууллага, тэдгээрийн төлөөлөгчид зэрэг санхүүгийн байгууллагуудын бие даасан, ашгийн бус, төрийн бус холбоо болно. Киргизийн банкны холбооны гол зорилго нь холбооны гишүүдийн эрх, ашиг сонирхлыг хамгаалах явдал юм.

МОНГОЛЫН БАНКНЫ ХОЛБОО

Монгол Улсын нутаг дэвсгэрт үйл ажиллагаа явуулах албан ёсны зөвшөөрөлтэй арилжааны банк, гаднын банкны төлөөлөгчийн газар, санхүүгийн салбарын дэд бүтцийн байгууллага, финтек компаниуд зэрэг 36-н байгууллагын төлөөллийг эгнээндээ нэгтгэсэн, гишүүн байгууллагуудынхаа нэгдмэл эрхийн төлөө 2000 оноос хойш үйл ажиллагаа явуулж буй ашгийн бус, төрийн бус байгууллага юм.

МОНГОЛЫН ТОГТВОРТОЙ САНХҮҮЖИЛТИЙН ХОЛБОО (ТоС Холбоо)

ТоС Холбоог 2017 онд Монголын банкны холбооноос үүсгэн байгуулсан бөгөөд Монголын санхүүгийн салбарт үйл ажиллагаагаа явуулж буй банкнууд, банк бус, бизнесийн байгууллагууд бүхий 32 байгууллагын гишүүнчлэлтэй үйл ажиллагаа явуулж байна. ТоС Холбоо нь Монгол Улсын санхүүгийн салбар болон бизнесийн байгууллагуудад байгаль орчин, нийгэмд ээлтэй үйл ажиллагааг нэвтрүүлэх, тогтвортой санхүү, ногоон зээл, хөрөнгө оруулалтын дэд бүтэц бүрдүүлж, тогтвортой хөгжил, ногоон эдийн засгийн өсөлтийг дэмжихийг зорьж ажилладаг.