Тооцоолол: 126 гишүүний цалин болон зардалд сард ₮3,5 тэрбум, жилд ₮42 тэрбум зарцуулагддаг
УИХ-ын гишүүдийн цалин хангамжийн асуудал шүүмжлэл дагуулаад буй. Хэвлэлд цалингийнхаа талаарх мэдээллийг хүртэл зөрүүтэй ярьцгаасан. Зарим нь бүр “Сард 20 сая төгрөг хүрэхгүй байгаа тул 40 саяыг нэмүүлье” гэж хүртэл аархсан.
Тэгвэл УИХ-ын гишүүд хэдэн төгрөгийн цалин авдаг вэ гэдгийг хүргэе.
Монгол Улсын Их Хурлын тухай хуулийн 42 дугаар зүйлийн 42.1-т УИХ гишүүний цалин хөлс, томилолт, бичиг хэрэг болон үйл ажиллагааны бусад зардлыг Улсын Их Хурлын жил бүрийн төсөвт тусгаж санхүүжүүлэхээр заасан.
УИХ-ын 2020 оны 40 дүгээр тогтоолын дагуу УИХ гишүүн нь сард үндсэн цалин 6.1 сая төгрөг, онцгой нөхцөлийн нэмэгдэл 30 хувь буюу 1.8 сая төгрөг нийт 7.9 сая төгрөгийн цалинтай.
Ингэхлээр 126 гишүүний сарын цалинд 768,6-995,4 сая төгрөг, жилийн цалинд 9,2-12 тэрбум төгрөг зарцуулагддаг байна.
Монгол Улсын Их Хурлын тухай хуулийн 42 дугаар зуйлийн 42.3-т гишүүн тойрогт ажиллахтай холбогдсон зардлын хэмжээг Улсын Их Хурал тогтоохоор заасны дагуу УИХ-ын 2024 оны 44 дүгээр тогтоолоор “Улсын Их Хурлын гишүүний төсөвт зардлыг төлөвлөх, тооцох, зарцуулах, тайлагнах журам”-ыг баталсан.
Журамд зааснаар гишүүний төсөв нь гишүүн болон түүний туслах, зөвлөх, бие төлөөлөгчийн цалин хөлс, хотын дотор хэрэглэх унааны зардал, тойрогт ажиллах томилолтын зардал, хууль, УИХ-ын бусад шийдвэрийн төсөл боловсруулах, хууль сурталчлах, бусад орны хууль тогтоомж, туршлагатай танилцах, судлахтай холбогдсон зардал болон холбогдох шийдвэрийн дагуу олгох бусад зардлаас бүрддэг.
2025 онд УИХ-ын нэг гишүүнд сард 21,8 сая төгрөгийн зардал төсөвлөгджээ.
Чингэхлээр 126 гишүүний сарын зардалд 2 тэрбум 746,8 сая төгрөг, жилийн зардалд 32 тэрбум 961,6 сая төгрөг зарцуулагддаг байна.
Сард авдаг 21.8 сая төгрөгөөр доорх үйл ажиллагааг санхүүжүүлэхээр тусгасан байна.
- хууль тогтоомжийн төсөл санаачлах, судалгаа хийх,
- хууль тогтоомжийн хэрэгцээ, шаардлагыг урьдчилан тандан судлах,
- хууль тогтоомжийн үр нөлөөний үнэлгээ, зардлын тооцоог хийх,
- хууль тогтоомжийн үзэл баримтлалын төсөл болон хууль тогтоомжийн төслийг боловсруулах,
- ашиг сонирхол нь хөндөгдсөн иргэн, хуулийн этгээдийн төлөөлөл, олон нийтээр хууль тогтоомжийн төслийг хэлэлцүүлэх, санал авах,
- хууль, тогтоомжийг иргэд, олон нийтэд сурталчлан таниулах,
- бусад орны хууль тогтоомж, туршлагатай танилцах, судлах,
- тойрогтоо ажиллах, иргэд, олон нийтийн үйл ажиллагаанд оролцох зэрэг арга хэмжээнд зориулагддаг байна.
Тэгэхээр УИХ-ын 126 гишүүний сарын болон жилийн цалин, зардлын хэмжээг нэмж тооцоолоё. Нэг сарын цалин болоод зардалд 3,5-3,7 тэрбум төгрөг, жилийн цалин болоод зардалд 42,1-44,9 тэрбум төгрөг зарцуулагддаг байна.
About Author
