ШИНЭ намтай нэгдсэн АН бүрмөсөн зүүний үзлээр замнах уу
ШИНЭ нам ээлжит бус их хурлаа гуравдугаар сарын 30-ны ням гарагт хийж, намаа Ардчилсан намд нэгтгэхээр эцэслэн шийдвэрлэжээ.
Тус шийдвэрийг ШИНЭ намын 1089 төлөөлөгчийн дийлэнх олонх буюу 99.3 хувийн саналаар гаргасан гэж мэдээлсэн байна.
ШИНЭ намын дарга Ц.Гантулгын хувьд “Бидний үнэт зүйл Ардчилсан намын үзэл баримтлалтай нийцэж байгаа. Энэ нэгдэл илүү хүчирхэг, хариуцлагатай улс төрийн хүчин болно” гэж хэлжээ.
Улс төрийн стратегийн хувьд зөв шийдвэр байж болно. Ардчилсан намд хүлээлгэх итгэл өсөж, Засгийн газрыг хамтран барьж буй хувьд түүнтэй нэгдэх нь арга замыг илүү хялбарчилна.
Нөгөө талаар энэ тоглоомын нам болчихов уу гэсэн эргэлзээ төрнө.
ШИНЭ гэдэг намыг анх Ж.Батзандан, Лу.Болд нар үүсгэн байгуулж байсан. Улс төр хийх гэж л. Учир нь Ж.Батзандан эргээд Ардчилсан нам руугаа явж, Лу.Болд элчин сайдын суудал аваад амар жимэр болж орхисон. Тэр хугацаанд ШИНЭ нам илүүтэй националист, консерватив хүмүүсээр дүүрсэн. Өнгөрсөн 2024 оны сонгуульд гэхэд л “Монсоник”-ийн Т.Баярхүү, сэтгүүлч Б.Отгон маягийн хүмүүст мандат өгч байв. Нөгөө талаас зохиолч Б.Наминчимэд нарын хүмүүст ч улс төрийн боломж олгож ирсэн байдаг.
Энэ дүр төрх нь Ардчилсан намын үзэл санаанаас эрс ялгаатай. Нэгдээд огтлолцох дундын үзэл санаа тун бага. Гэхдээ Ардчилсан нам ч барууны биш зүүний нам болоод удаж байгаа.
Өнгөрсөн жилүүдэд ШИНЭ намын галыг таслалгүй явж ирсэн гишүүд нь энэ нэгдэлд дургүй байдаг. Ц.Гантулгаа ч намын дарга гэж хүлээн зөвшөөрдөггүй байх жишээтэй.
Зүүний үзэл дээр зүүний үзлийг нэмэхээр бүр хүчтэй зүүний үзэл л болно. ШИНЭ намын малгайн дор хэн хэн улс төрийн карьер хөөх бол. Нөгөө талд энэ шийдвэрийг хүлээж авсан Ардчилсан намынханд ямар стратеги байж таарах вэ, тэдэнд юугаараа ашигтай вэ зэрэг олон асуулт үлдэж байна.
About Author
