“MCS”-ийн нүүрсийг олборлодог компанийн гүйцэтгэх захирал асан Г.Дамдиннямын хөрөнгө 5 жилд 2 тэрбумаар өсжээ

Эх сурвалж:Eguur.mn

MCS ба “Онтре”-д АМНАТ-ийн давуу эрх олгосон шалтгаанаар Засгийн газрыг огцруулах гарын үсгийг П.Сайнзориг гишүүн өөрийн бланкан дээр цуглуулж эхэлсэн.

Төсөвт АМНАТ-өөс олох 200 тэрбум төгрөгийн боломжийг хаасан гэх 55-р тогтоолыг 2025.08.20-нд баталсан байдаг. Тухайлбал, ААН тухайн төрлийн бүтээгдэхүүний экспортынхоо дөрөвний нэгийг биржээр арилжаалбал нийт экспорт дээрээ биржийн үнэлгээгээр АМНАТ тооцож төлөх заалт тусгагдсан.

Гэтэл бирж болон Ганцмодны үнийн зөрүү 30-40 ам.доллар. Төгрөгт шилжүүлбэл, 140 мянган төгрөгөөс давсан зөрүү гарна. Ингэснээр нүүрс экспортлогчид АМНАТ-аас чөлөөлөгдөж байгаа учир шүгэл үлээж байна хэмээн П.Сайнзориг мэдэгдсэн.

“MCS” ба Г.Дамдинням…

Угтаа нүүрс экспортолдог хувийн ганцхан том компани нь MCS-ийн охин компани “Энержи ресурс” юм.

Улмаар 55-р тогтоолд гар бие оролцсон Аж үйлдвэр, эрдэс баялгийн сайд Г.Дамдиннямыг MCS компаниас дэмжлэг авдаг учир давуу байдал олгосон байж болзошгүй гэх мэдээлэл хөвөрч буй. Тэгвэл Г.Дамдинням “MCS”-тэй ямар холбоотойг хүргэе.

Г.Дамдинням “MCS”-ийн харьяа “Энержи ресурс” ХХК-ийн “Ухаа худаг”-ийн уурхайн хөрс хуулалт, нүүрс олборлолтыг гүйцэтгэгч “Вертекс майнинг партнер” ХХК-ийн хамтран эзэмшигч, гүйцэтгэх захирал байсан. “MCS” группээс дэмжлэг хүртэгсдийн нэг гээд шуудхан хэлж болохуйц. Сайд болсныхоо дараа “Ухаа худаг”-ийг тултал хамгаалах үүрэгтэйгээр Уул уурхайн сайдаар очиж байгаа гэж бичигдсэн ч удаа бий.

-Хоёр удаа сонгогдсон, хоёр компаниар холбогдсон Г.Дамдинням, Х.Ганхуяг хоёр-

Г.Дамдинням “Вертекс майнинг партнер” ХХК-ын хувь эзэмшлээс 2018 оны наймдугаар сарын 02-нд хасагдсан. Өдгөө Глобал Майнинг Сервис гэх компани хувь эзэмшиж УИХ-ын гишүүн Х.Ганхуягийн эгч Х.Хашчимэг гүйцэтгэх захирлаар, ээж П.Бямбасүрэн нь эцсийн өмчлөгчөөр бүртгэлтэй.

Харин хамгийн сүүлд /2024 он/ АТГ-д мэдүүлсэн ХОМ-ээс нь харахад “Топ майнинг солюшнс” ХХК-ийн 50 хувийг эзэмшдэг хэмээсэн. Тус компани мөн л Х.Ганхуягийн ээж П.Бямбасүрэнгийн эцсийн өмчлөл, гүйцэтгэх захирлаар ах Х.Гантулга нь бүртгэлтэй байна. Г.Дамдиннямын хамаарлыг тодруулан харвал 2018 оны 11 сарын 14-нд хувь эзэмшлээс хасагджээ. Дээрх хоёр компаниас нэрээ хасуулсан огноо бол түүний гишүүн болохоор зэхэж явсан цаг.

УИХ-ын хоёр гишүүн 2017 онд байгуулагдсан дээр нэр дурдагдсан хоёр компаниар ийн холбогдож байна. Мөн “Вертекс майнинг партнер” ХХК-даа Хөгжлийн банкнаас 33 тэрбумын санхүүжилтыг хууль зөрчиж авсан хэмээн тэд шалгагдаж явсан. Гэсэн ч шүүхээс тэдэнд холбогдох хэргийг хэрэгсэхгүй болгож шийдвэрлэж байв.

Х.Ганхуяг, Г.Дамдинням хоёул 2020 оноос хойш УИХ-ын гишүүний суудалд тухалсан. Х.Ганхуяг гишүүн Төсвийн байнгын хорооны даргаар, Г.Дамдинням Аж үйлдвэр, эрдэс баялгийн сайдаар ажиллаж буй нь энэ.

Үргэлжлүүлэн Г.Дамдиннямын ХОМ-ийг сөхөж харвал сүүлийн таван жилд үлэмж нэмэгджээ.

2019, 2024 онд АТГ-д мэдүүлсэн ХОМ-ийг харьцуулан харахад,

Нийт орлого нь 870 саяар нэмэгдэж 1.1 тэрбум,
975 сая төгрөгөөр үнэлэгдэх хаустай болсон,
2019 онд машингүй гэж мэдүүлж байсан ч, 2024 онд 300 саяар үнэлэгдэх Land Criuser 300 хөлөглөж,
595 сая төгрөгийн үнэт эдлэлтэй болж,
Дотоодын банкны хадгаламж нь 16 саяар буурч 41 сая төгрөг,
Гадаадад буй хадгаламж нь 35 саяар өсөж 65 сая төгрөг,
Авлагын хэмжээ нь 100 саяар өсөж 2.9 тэрбум болсон байна.