“Өөрийнхөөрөө бай” гэх зөвлөгөө карьер өсөлтөд нөлөөлдөггүй
• Колумбийн их сургуулийн профессор Томас Чаморро-Премузич хувь хүний үнэнч байдлыг хэт шүтэх нь карьерын ахицад саад болдог гэж анхаарууллаа.
• Тэрбээр сэтгэл хөдлөлийн ухаан, хамт олноо ойлгох чадвар, уян хатан
сэтгэлгээ нь амжилтын гол түлхүүр гэв.
• Саяхан хэвлэгдсэн “Don’t Be Yourself” нэртэй шинэ номдоо тэр хүн бүр
өөрийгөө хөгжүүлэхийг хамгийн үр дүнтэй өөрчлөлтийн үндэс хэмээн тодорхойлжээ.
Колумбийн их сургуулийн сэтгэл зүйн профессор Томас Чаморро-Премузич “Өөрийнхөөрөө бай” гэх түгээмэл зөвлөгөө нь хүний карьер өсөлтөд огт нөлөөлдөггүй бөгөөд ажил мэргэжлийн орчинд тохирохгүй хэллэг хэмээн үзэж байна. Түүний тайлбарласнаар хувь хүний “үнэнч зан чанар”-ыг хэт дөвийлгөх нь өсөлт, ахих боломжийг хязгаарлаж, байгууллагын үр дүнд сөргөөр нөлөөлдөг ажээ.
Профессорын хэлснээр, амжилтад хүрэхийн тулд сэтгэл хөдлөлийн ухаан, бусдыг ойлгох, нөхцөл байдалд дасан зохицох чадвар илүү чухал. “Өөрийгөө байгаагаар нь хамгаалахын оронд илүү үр өгөөжтэй, бусдад эерэг нөлөө үзүүлдэг хүн болохыг зорих хэрэгтэй” гэж тэр зөвлөсөн байна.
Тэрбээр 2025 оны аравдугаар сарын 7-нд хэвлэгдсэн “Don’t Be Yourself: Why Authenticity Is Overrated (and What to Do Instead)” буюу “Битгий өөрийнхөөрөө бай, хувь хүний үнэнч зан чанарыг дөвийлгөхгүй юу хийж болох вэ” нэртэй шинэ номондоо хувь хүний өсөлт хөгжлийн гол суурь нь өөрийгөө таних, шүүмжийг хүлээн авч сурах, бусдыг ойлгох чадвар гэж тодорхойлжээ.
Чаморро-Премузичийн үзэж байгаагаар ажил мэргэжлийн амжилт нь оюун ухаанаас гадна нийгмийн харилцааны мэдрэмж, хамтын орчинд үр дүнтэй харилцах чадвараас хамаардаг. Сэтгэл хөдлөлийн өндөр ухаантай хүн шүүмжлэлийг боломж болгон ашиглаж, хамт олны итгэлийг илүү амархан олж авдаг гэж тэр тайлбарлав.
Түүнчлэн хүмүүс өөрийгөө зөвхөн өнгөрсөн туршлага, зан төлөвөөр тодорхойлох нь ирээдүйн боломжийг хязгаарлах эрсдэлтэй гэж профессор анхааруулжээ. Ирээдүйг бүтээх чадвар нь өөрийн давуу болон сул талыг ялгаж таних, төсөөллөө бодит үйлдэлтэй уялдуулахад оршдог гэв.
Эцэст нь тэр “амжилт бол хувь хүний үнэнч зан чанарын илэрхийлэл бус, харин өөрийгөө уялдуулах, бусдад үнэ цэн өгдөг байх чадварын үр дүн” хэмээн онцоллоо. Ийм хандлагатай хүмүүс багийн орчинд илүү хүчтэй байр суурь эзэлж, карьерын өсөлтөнд бодит нөлөө үзүүлдэг гэж тэр дүгнэсэн байна.
