“China daily”-д нийтлэгдсэн нийтлэлийг орчуулан хүргэж байна.

Монгол Улс БНХАУ-тай байгаль орчныг хамгаалах, худалдаа, аялал жуулчлал, ялангуяа хил орчмын бүс нутагт хоёр талын хамтын ажиллагааг идэвхжүүлснээр илүү их үр дүнд хүрнэ гэж найдаж байна гэж Монголын өндөр албан тушаалтан хэллээ.

Монгол Улсын Байгаль орчин, аялал жуулчлалын сайд Б.Бат-Эрдэнэ “China Daily” сонинд өгсөн ярилцлагадаа “Сүүлийн жилүүдэд хоёр улсад ойр ойрхон элсэн шуурга болж байгаа тул Монгол, Хятад хоёр говь цөлийг хамгаалах хүчин чармайлтаа эрчимжүүлэх шаардлагатай байна.

Хүмүүс нэг гараг ​​дээр амьдардаг. Гэвч  шар шороон шуурга хил хязгаар гэж  мэддэггүй. Тийм учраас бид цөлжилт, уур амьсгалын өөрчлөлт зэрэг нийтлэг сорилтуудыг хамтдаа даван туулахын тулд ирээдүйтэй хамтын нийгэмлэгийг бий болгох хэрэгтэй” гэжээ.

Сайд энэ сарын эхээр Төвөдийн өөртөө засах оронд хийсэн айлчлалаа дурсаад ууланд мод тарих боломжийг олгосон Хятад улсын дэвшилтэт технологи ихээхэн урам, зориг өгсөн талаар ярьсан байна.  Цөлийн бүс нутагт ногоон бүсүүд нэмэгдэж, усан хангамж нэмэгдэж байгааг дурдаад “Хятадын хийсэн зүйл бол гайхалтай. Элсэн цөлд ямар мод тарьж болох талаар хоёр улс хамтарсан судалгааны баг байгуулсан. Ийм хүчин чармайлт нь Монгол Улс 2030 он гэхэд нэг тэрбум мод тарих зорилтыг хэрэгжүүлэхэд хувь нэмэр оруулна” гэв.

БНХАУ-д албан ёсны айлчлал хийж буй Монгол Улсын Ерөнхий сайд Л.Оюун-Эрдэнэ тэргүүтэй төлөөлөгчид Зуны Давосын  14 дэх удаагийн чуулга уулзалтад оролцож, тэдний айлчлал даваа-бямба гараг хүртэл үргэлжилсэн. Л.Оюун-Эрдэнийн БНХАУ-ын удирдагчидтай хийсэн хоёр талын хэлэлцээний хэлэлцэх асуудлын нэг бол байгаль орчныг хамгаалах асуудал байв. Хоёр тал цөлжилтөөс урьдчилан сэргийлэх, ан амьтдыг хамгаалах чиглэлээр хамтран ажиллахад бэлэн байгаагаа илэрхийлэв. Сайд Б.Бат-Эрдэнийн хэлснээр, Монгол Улсын Ерөнхий сайдын айлчлалын үеэр хоёр улс Монгол орны ховор мазаалай баавгайг хамгаалах тухай хэлэлцээрийг сунгасан байна. Цаашид Монгол Улс тахлын дараах эдийн засгийг сэргээх хүчин чармайлтынхаа хүрээнд Хятад улстай худалдаа, хөрөнгө оруулалт, аялал жуулчлалын салбарт хамтын ажиллагаагаа хөгжүүлнэ гэж найдаж байна.

Хятад, Монголын  худалдааны хэмжээ өнгөрсөн оны эхний 11 сарын байдлаар  10 тэрбум 790 сая ам.долларт хүрч, өмнөх оны мөн үеэс 24 хувиар өссөн талаар Хятадын ГХЯ мэдээлжээ. Монгол Улс 2023-2025 оныг “Монгол Улсад айлчлах жил” болгон зарласан бөгөөд энэ хугацаанд нэг саяас доошгүй гадаадын жуулчин хүлээж авах зорилт тавин ажиллаж байгаагийн 300 мянга нь БНХАУ-аас ирсэн талаар Б.Бат-Эрдэнэ сайд ярьжээ. Мөн Монгол Улсын Засгийн газар, УИХ хоёр улсын хил орчмын аялал жуулчлалыг хөгжүүлэх алхам болох Казиногийн үйл ажиллагааны тухай хуулийн төсөл боловсруулахаар ажиллаж байна.

About Author

mnews2

See author's posts