mnews.mn

НЗДТГ болон БНСУ-ын Экспорт-Импортын банк хамтран хэрэгжүүлж буй “Баянголын ам түрээсийн орон сууцны хороолол барих төсөл”-ийн хэрэгжүүлэгч талууд уулзалт зохион байгууллаа. Уулзалтад Нийслэлийн Орон Сууны бодлогын газар, Нийслэлийн орон сууцны корпораци, төслийн зөвлөх үйлчилгээ үзүүлж буй Аум ба Лий түншлэлийн төлөөлөл болон Кореа Их сургуулийн Сэжонг кампус дахь Хот судлалын тэнхимийн төлөөлөл оролцон, Нийслэлийн түрээсийн орон сууцны бодлогын талаар хэлэлцсэн юм.

Энэ үеэр зөвлөх үйлчилгээ үзүүлж буй Аум ба Лий түншлэл түрээсийн орон сууцны байгууллага, түүний менежментийн санал, түрээсийн орон сууцны оршин суугчийг сонгон шалгаруулах журмын санал боловсруулж, танилцуулав. Мөн талууд төслийн хүрээнд нийслэлийн орон сууцны өнөөгийн нөхцөл байдал, түрээсийн орон сууцны төсвийн талаар хамтран судалгаа хийхээр төвлөсөн бөгөөд уг судалгааны бичиг баримт нь улс, нийслэлийн хэмжээнд хэрэгжүүлэх төслүүдийн суурь мэдээлэл болох тул нэн хэрэгцээтэй гэдгийг онцолсон юм. Тэрчлэн түрээсийн орон сууцны бодлогыг урт хугацаагаар төлөвлөж, бодлогын тогтвортой хэрэгжилтийг хангах шаардлагатайг хэлж байлаа.

Уулзалтын төгсгөлд талууд нийслэлийн орон сууцны судалгааг нарийвчлах саналуудын боловсронгуй болгохоор шийдвэрлэхээр тохиролцов.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Сонгуулийн ерөнхий хорооны дарга П.Дэлгэрнаран, Нарийн бичгийн дарга Д.Даваа-Очир болон холбогдох албан тушаалтнууд МЕТА компанийн Төв Азийн орнууд, Монгол, Шри Ланка, Малдивын орнуудын төрийн бодлого хариуцсан захирал Сенүра Абейвардена тэргүүтэй төлөөлөгчдийг 2024 оны 4 дүгээр сарын 24-ний өдөр хүлээн авч уулзлаа.

Монгол Улсын Их Хурлын 2024 оны ээлжит сонгууль зохион байгуулах үйл ажиллагааны талаарх мэдээллийг сонгогчдод хүргэх болон сонгуулийн сурталчилгааны ил тод, нээлттэй, шударга байдлыг бүрдүүлэх, хуурамч мэдээ, мэдээлэл, хаягийг бүртгэж, устгах технологийн боломжийн талаар МЕТА компанийн төлөөлөгчид танилцуулав.

Сонгуулийн шударга байдлыг хангах хамтын ажиллагааны хүрээнд сонгогчдыг мэдээллээр хангах, хуурамч мэдээ мэдээлэл, хаягийг бүртгэж, устгах, тархалтыг бууруулах талаар талууд санал солилцож, хамтран ажиллах төлөвлөгөөгөө ярилцлаа.

Хамтын ажиллагааны хүрээнд МЕТА компаниас улс төрийн нам болон хэвлэл мэдээллийн байгууллага, сэтгүүлчдийн төлөөлөлд 2024 оны 4 дүгээр сарын 25-ны өдөр Сонгуулийн ерөнхий хорооны байранд сургалт зохион байгуулах юм.

Уулзалтад Сонгуулийн ерөнхий хорооны гишүүн Д.Баяндүүрэн, Тамгын газрын дарга Д.Бат-Эрдэнэ, гадаад харилцааны зөвлөх Ч.Баттөмөр, гадаад харилцааны ажилтан Б.Уянга, МЕТА компанийн Ази, Номхон далайн хөтөлбөрийн менежер Кю Кю Тэн, Хуурамч мэдээллийн бодлого хариуцсан менежер Алис Будисатрио, Мэдээллийн үнэн зөв байдал, стратегийн түншлэлийн хөгжил хариуцсан ажилтан Никол Хан, Түншлэлийн сүлжээ, Төв Азийн орнуудын бодлого хариуцсан менежер Аврора Ли нар оролцлоо.

Боловсрол, соёл, шинжлэх ухаан, спортын байнгын хорооны хуралдаан өнөөдөр /2024.04.24/ Төрийн ордны “Жанжин Д.Сүхбаатар” танхимд 10 цаг 42 минутад эхэллээ. Хуралдаанаар таван асуудлыг хэлэлцэж шийдвэрлэв. Байнгын хорооны дарга, Улсын Их Хурлын гишүүн Б.Баярсайхан хуралдаанаар хэлэлцэх асуудлын товыг танилцуулсны дараа Улсын Их Хурлын гишүүн Т.Аубакир хэлэлцэх асуудлаас Хүмүүнлэг боловсролыг дэмжих тухай хуулийн төслийг хойшлуулж өгөхийг хүсэв. Уг хуулийн төслийг хойшуулах эсэхээр санал хураахад хуралдаанд оролцсон гишүүдийн 58,3 хувь дэмжиж, хойшлуулахаар боллоо.

Харин дараа нь Засгийн газраас 2024 оны 04 дүгээр сарын 18-ны өдөр өргөн мэдүүлсэн Шинжлэх ухаан, технологийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг шийдвэрлэлээ. Төслийг Улсын Их Хурлын гишүүн, Боловсрол, шинжлэх ухааны сайд Л.Энх-Амгалан танилцуулсан бөгөөд Улсын Их Хурал Шинжлэх ухаан, технологийн тухай хуулийг 1998 онд, тус хуулийн шинэчилсэн найруулгыг 2006 онд баталж, эрх зүйн орчинг зохицуулсан талаар дурдав. Шинжлэх ухаан, технологийн тухай хуулийг баталснаас хойш нийтдээ найман удаа нэмэлт, өөрчлөлт оруулсан. Гэвч хөрөнгө, санхүүгийн хомсдол, салбарын бодлого, төлөвлөлтийн уялдаа холбоо сул, удирдлага, бүтэц, зохион байгуулалтын оновчгүй байдал зэргээс шалтгаалан дэвшүүлсэн зорилт, үр дүнд хүрэхгүй байна. Шинжлэх ухааны салбарт 1993-2022 онд нийт 178,6 тэрбум төгрөгөөр 4688 төсөл хэрэгжүүлж, 54934 шинжлэх ухаан, технологийн бүтээгдэхүүн, үйлчилгээг бий болгосон. Үр дүнд нь патент 352, ашигтай загвар 304, зохигчийн эрх 166, бүтээгдэхүүний загвар 700, технологи 768, тоног төхөөрөмжийн туршилтын загвар 233, ном бүтээл 2473, үйлдвэрлэл, үйлчилгээ явуулах ТЭЗҮ 148, стандарт, зөвлөмж, заавар, аргачлал 3532, үйлдвэрлэлд нэвтрүүлсэн үр дүн 723-г баталгаажуулжээ.

Боловсрол, шинжлэх ухааны сайдын 2022 оны А/48 дугаар тушаалаар байгуулсан Ажлын хэсэг Шинжлэх ухаан, технологийн тухай хуулийн шинэчилсэн найруулгын төслийг боловсруулахдаа зарим шаардлагатай нэр томьёог шинэчилж, шинжлэх ухаан, технологийн нэгдсэн болон бүс, орон нутагт хөгжүүлэх бодлого, тэргүүлэх чиглэл, цөм технологийг тодорхой болгож, УИХ, Засгийн газар, Шинжлэх ухаан, технологи, инновацын үндэсний зөвлөл, Үндэсний шинжлэх ухаан, технологи, инновацын хөгжлийн агентлаг, Үндэсний шинжлэх ухаан, технологийн сан болон шинжлэх ухаан, технологи, инновацын үндэсний тогтолцоо,  үйл ажиллагаа, удирдлага, зохион байгуулалтын зохицуулалт, шинжлэх ухаан, технологийг хөгжүүлэхэд төрөөс үзүүлэх дэмжлэг, эрдэм шинжилгээний байгууллага, үндэсний судалгаа хөгжүүлэлт төсөл, суурь шинжлэх ухаан, хувийн хэвшлийн судалгаа хөгжүүлэлт, технологийг дэмжих, шинжлэх ухаан технологийн олон улсын хамтын ажиллагааны зохицуулалт; шинжлэх ухаан, технологийн хүний нөөцийг бэлтгэх, шинжлэх ухааны авьяастныг нээх, эрдэм шинжилгээний ажилтны нийгмийн баталгааг хангах зохицуулалт; шинжлэх ухаан, технологийн үйл ажиллагааны санхүүжилт, хөрөнгө оруулалт, дэд бүтцийг өргөжүүлэх, санхүүжилтийн эх үүсвэр, санхүүжилтийн журам, захиалагч, гүйцэтгэгчийн эрх, үүргийн зохицуулалт; хуулийн хэрэгжилтэд хяналт тавих, маргааныг хянан шийдвэрлэх болон хууль зөрчигчид хүлээлгэх хариуцлагатай холбоотой зохицуулалтыг тусгажээ.

Хуулийн төсөл батлагдсанаар Монгол Улсын Үндсэн хуулиар баталгаажсан шинжлэх ухаан, технологийн бодлого, урт болон дунд хугацааны бодлогын баримт бичигт шинжлэх ухаан, технологи, инновацыг хөгжүүлэх чиглэлээр тусгагдсан зорилтуудыг үр дүнтэй хэрэгжүүлэх хууль, эрх зүйн орчин бүрдэнэ. Мөн шинжлэх ухаан, технологийн үйл ажиллагаанд оролцогчдын эрх, үүргийн хуваарилалтыг оновчтой тогтоож, удирдлага, бүтэц, зохион байгуулалт, үйл ажиллагааны хувьд олон улсын жишигт нийцсэн тогтолцоог системтэйгээр бүрдүүлж, нийгэм, эдийн засаг, хүний амьдралын чанарын үзүүлэлт дээшилж, дэвшил гарна. Түүнчлэн, шинжлэх ухаан, технологи, инновацын чиглэлээр төр, хувийн хэвшлийн түншлэл нэмэгдэж, салбар дундын болон салбар дамнасан хамтын ажиллагаа өргөжиж шинжлэх ухаан, технологийн үйл ажиллагааны санхүүжилтийн тогтолцоо оновчтой, олон эх үүсвэртэй болж, ил тод байдал хангагдаж, санхүүжилт болон үр дүнг уялдуулан хяналтыг сайжруулах боломж бүрдэнэ гэж үзжээ.

Хэлэлцэж буй асуудалтай холбогдуулан Улсын Их Хурлын гишүүн Ц.Мөнхцэцэг, Г.Мөнхцэцэг нар шинжлэх ухааны салбарын төсвийн хэмжээ, шинжлэх ухааны сан бүрдүүлэлт, эрдэм шинжилгээний байгууллагын талаар асуув. Боловсрол, шинжлэх ухааны сайд Л.Энх-Амгалан, шинжлэх ухаан, технологийн сан зайлшгүй байх шаардлагатай, байгаа төсөвтөө тааруулан судалгаа явуулж ирсэн. Өнгөрсөн хугацаанд тус сангаас санхүүжүүлсэн элэг шилжүүлэн суулгах болон ганд тэсвэртэй Дарханы сорт зэрэг үр дүнд хүрсэн төслүүд нь улсын эдийн засагт эерэгээр нөлөөлж, олон тэрбум төгрөг хэмнэж байна. Манай шинжлэх ухаан, технологийн сан нь Азийн шинжлэх ухааны байгууллагууд дунд 22 дугаарт эрэмбэлэгддэг хэмээн хариулав.

Улсын Их Хурлын гишүүн Ч.Ундрам, шинжлэх ухааны технологийн хүний нөөцийг бүрдүүлэхийн тулд ерөнхий боловсролын сургалтын хөтөлбөрт тусгаж, багаас нь бэлтгэснээр ирээдүйн эрдэмтдийг бий болгоно. Монгол Улсын Их Сургууль, Шинжлэх ухааны академи зэрэг байгууллагуудын уялдаа холбоог хэрхэн зохицуулсан, шинжлэх ухааны ажилтнуудын цалин, хөлсний бодлого, эрүүл өрсөлдөх орчин, зөв хамтралыг бүрдүүлэх, санхүүжилт зэргийг тодруулж асуув. Манай улс байгалийн ухааны сургалтаар хоцролттой явааг судалгааны дүн харуулсан тул бага, дунд ангийн сургалтын хөтөлбөрт шинжлэх ухааны чиглэлийн хичээл, сургалтыг түлхүү нэвтрүүлэх, авьяастанг илрүүлэх зэрэг зохицуулалтыг төсөлд тусгасан болохыг салбарын сайд танилцууллаа.

Харин Улсын Их Хурлын гишүүн Ж.Чинбүрэн хуулийн төслийг дэмжихээ илэрхийлээд эмнэл зүйн судалгаа манай улсад байдаггүй. Бусад салбарт ч иймэрхүү байдалтай байгаа. Шинжлэх ухааны салбар хороог Монгол Улсын Ерөнхий сайдын дэргэд байгуулах тухай заалтыг дэмжинэ. Эрдэм шинжилгээний ажилтны ёс зүйн асуудлыг зайлшгүй тусгах шаардлагатай, ингэснээр салбар хоорондын уялдааг зохицуулах боломжтой гэв. Улсын Их Хурлын гишүүн Т.Аубакир, шинжлэх ухаан, технологийн санг салбар тус бүрийн яаманд харьяалуулах нь дээр гэсэн санал гаргаснаа сануулахын зэрэгцээ салбарын болон технологийн өөрчлөлттэй уялдсан шийдвэрийг тухай бүрт гаргаж хэвших нь асуудлыг шийдэхэд тустай хэмээв. Шинжлэх ухааны судалгааг эхлүүлсэн ч санхүүжилтгүйн улмаас үр дүнг нь хэрэгжүүлдэггүй, “Үхлийн хөндий” буюу үр дүнгүй үлддэг байдлыг энэ хуулийн төсөл зогсооход дэмжлэг үзүүлнэ гэж Ажлын хэсэг хариуллаа.

Улсын Их Хурлын Боловсрол, соёл, шинжлэх ухаан, спортын байнгын хорооны дарга Б.Баярсайхан, урьд өмнө нь боловсролын сангийн зээлийг давуу эрхээр олгосон, хууль зөрчсөн асуудал гарч байсан, үүнийг давтагдахгүй гэх баталгаа бий эсэх, шинжлэх ухааны салбарт ёс зүйн зөрчил гарахгүй байх боломжтойг лавлав. Боловсрол, шинжлэх ухааны сайд Л.Энх-Амгалан, шинжлэх ухааны цогцолборыг 150 тэрбум төгрөгийн өртөгтэй барьж, удахгүй ашиглалтад оруулна. Төрөлжсөн ахлах сургуулиудыг бүх аймгийн төвд байгуулахаар хуулиййн төсөлд тусгасан. Сангуудыг шилэн болгож, ил тод байлгах тогтолцоог бүрдүүлсэн. Докторын ажлуудыг шүүж үзэж, оюуны хулгай байгаа, үгүйг шүүж үзнэ гэсэн мэдээллийг өгөв.

Хуралдаан ийнхүү асуулт, хариултаар үргэлжилсний эцэст дээрх хуулийн төслүүдийг хэлэлцэх эсэхийг санал хурааж шийдвэрлэхэд, хуралдаанд оролцсон гишүүдийн 58,3 хувь нь дэмжлээ. Төслийн талаарх санал, дүгнэлтийг Улсын Их Хурлын 2024 оны хаврын ээлжит чуулганы нэгдсэн хуралдаанд танилцуулахаар болов.

Спортын салбарт хөрөнгө оруулсан бол 6 төрлийн хөнгөлөлт, дэмжлэг эдэлнэ

Засгийн газраас 2024 оны 04 дүгээр сарын 18-ны өдөр өргөн мэдүүлсэн Биеийн тамир, спортын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг шийдвэрлэлээ. Байнгын хорооны хуралдаанд хуулийн төслийг Улсын Их Хурлын гишүүн, Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ танилцуулав.

Тэрбээр, Улсын Их Хурлын “Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай” 12 дугаар тогтоолын хавсралтад Биеийн тамир, спортын тухай хуульд нэмэлт, өөрчлөлт оруулах тухай тусгасан. Хүн амыг хөдөлгөөний дутагдлаас урьдчилан сэргийлэх, эрүүл амьдрах зан төлөвт насан туршийн дадал олгох зорилго бүхий биеийн тамир, спортын хүртээмжтэй үйлчилгээ үзүүлэх төр, хувийн хэвшлийн түншлэлд суурилсан нээлттэй, уян хатан тогтолцоог үндэсний хэмжээнд бүрдүүлэх шаардлага үүссэн. 

Биеийн тамир спортын тухай хуулийн шинэчилсэн найруулгын төслийг Ажлын хэсэг 8 удаа, ажлын дэд хэсгүүд 20 гаруй удаа хэлэлцэж,  8 бүлэг, 41 зүйлтэй байхаар боловсруулжээ. Нээлттэй хэлэлцүүлгийг спортын 68 холбоо, судалгааны 5 байгууллага, аймаг, дүүргийн биеийн тамир, спортын байгууллагын 30 удирдах ажилтан, 300 гаруй тамирчин, дасгалжуулагч, шүүгч, хувийн хэвшлийн 20 орчим төлөөлөл, хөрөнгө оруулагч, ивээн тэтгэгчдийг оролцуулан зохион байгуулж, дэвшүүлсэн саналын 72 хувийг хуулийн төсөлд тусгасан. Хуулийн шинэчилсэн найруулгын төсөл нь биеийн тамир, спортын салбарын үйл ажиллагааг “Алсын хараа-2050”-д уялдууулан “Идэвхтэй амьдралын хэвшилтэй иргэн, гэр бүлийг дэмжиж, биеийн тамир, спортын ээлтэй орчныг бүрдүүлэх” зорилтыг биелүүлэх нөхцөлийг бүрдүүлэхэд чиглэсэн. Шинэчилсэн найруулгын төсөлд “Сэтгэл, оюуны болон бие бялдрын боловсрол олгох”, “Зөв дадал хэвшлийг дэмжих” гэж тусгасан нь зөвхөн төрийн бодлого, дэмжлэгээс гадна хувь хүний эрүүл мэндийг сахин хамгаалах үүрэг, оролцоо чухал болохыг тодорхойлж, “Иргэн, гэр бүлийн эрхэмлэх зүйл” гэсэн шинэ бүлгийг нэмсэн.

Спортын тамирчид, дасгалжуулагч, шүүгч, ажилтан, аргазүйч нь оюун ухаан, бие бялдар, ёс суртахууны зөв хандлагатай бүтээлч иргэн, идэвхтэй амьдралын дадал хэвшилтэй гэр бүлийн орчныг төлөвшүүлэхийн төлөө ёс зүйн нийтлэг хэм хэмжээг сахин мөрдөхөөр хуулийн шинэчилсэн найруулгын төсөлд заажээ. Тухайлбал, спорт холбоо бүр өөрийн ёс зүйн зөвлөлтэй байх, ёс зүйн хэм хэмжээг зөрчсөн тухай гомдлыг салбарын асуудал эрхэлсэн Засгийн газрын гишүүний дэргэдэх Ёс зүйн зөвлөл хэлэлцэн шийдвэрлэх, ёс зүйн зөрчил гаргасан тохиолдолд мөнгөн шагнал, урамшууллыг олгохыг түр түдгэлзүүлэх, бусад арга хэмжээ авах зэрэг заалт оруулсан. Монгол Улсын Засгийн газраас допингийн эсрэг үйл ажиллагаанд хуримтлагдсан асуудлыг шийдвэрлэх зохицуулалтыг тусгаж, холбогдох байгууллагуудын чиг үүрэг, ажлын уялдаа холбоо, хяналт, тэнцлийг боловсронгуй болгох, допингийн эсрэг үйл ажиллагааг зохицуулах бүлгийг боловсруулсан. Ингэхдээ Дэлхийн допингийн эсрэг байгууллага буюу WADA-тай харилцан зөвшилцсөн хэмээн танилцууллаа. Спортын салбарт хөрөнгө оруулж буй компаниудад аж ахуйн нэгжийн орлогоос төлөх татвар, гаалийн тарифын хөнгөлөлт зэрэг 6 төрлийн хөнгөлөлт, дэмжлэг үзүүлэхээр төсөлд тусгажээ. Хөгжлийн бэрхшээлтэй тамирчин, дасгалжуулагч, спортын холбоодын үйл ажиллагааг зохицуулсан 8 заалтыг шинээр оруулсан. Мөн сум, дүүрэг бүрт биеийн тамирын аргазүйч ажиллуулна. Улсын хэмжээнд 430 орчим спортын аргазүйч ажиллуулах хэрэгцээ үүснэ. Биеийн тамирын үйлчилгээг иргэн бүрд хүргэх боломж нээгдэнэ хэмээн танилцуулав.

Хуулийн төсөлтэй холбогдуулан Улсын Их Хурлын гишүүн Ц.Мөнхцэцэг, Ч.Ундрам, Б.Баярсайхан нар асууж, байр сууриа илэрхийлсэн юм. Гишүүд асуулт асууж, хариулт авсны дараа хуулийн төслийг дэмжье гэсэн саналын томьёоллоор санал хураалт явуулахад тус Байнгын хорооны дарга Б.Баярсайхан, Улсын Их Хурлын гишүүн Т.Аубакир нарын төхөөрөмж гацсан тул өмнөх санал хураалтуудыг хүчингүйд тооцож, дахин санал хурааж, хуралдаанд оролцсон гишүүдийн 58,3 хувь нь дэмжсэн тул хуулийн шинэчилсэн найруулгын төслийг Улсын Их Хурлын хаврын ээлжит чуулганы нэгдсэн хуралдаанд танилцуулахаар тогтлоо.

Соёлын бүтээлч үйлдвэрлэлийг дэмжих тухай хуулийн төслийг дэмжлээ

Байнгын хороо энэ өдрийн хуралдаанаараа Соёлын бүтээлч үйлдвэрлэлийг дэмжих тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийлээ. Засгийн газраас 2023 оны 04 дүгээр сарын 19-ний өдөр өргөн мэдүүлсэн уг хуулийн төслийг хэлэлцүүлэгт бэлтгэсэн талаарх мэдээллийг Ажлын хэсгийн ахлагч, Улсын Их Хурлын гишүүн Ч.Ундрам танилцуулсан юм. Монгол Улсын “Алсын хараа-2050” Монгол Улсын урт хугацааны хөгжлийн бодлогын 1.2-т “Үндэсний оюун санаа, өв соёл, сэтгэлгээнд тулгуурласан бүтээгч монгол хүн төвтэй улс болно. Монгол хүний оюуны бүтээлийг дэлхийн зах зээлд сурталчлах төсөл хэрэгжүүлнэ…” гэж, 4.2-т “Бүтээлч үйлдвэрлэл хөгжлийн бодлогын суурийг тавьж, бүтээлч үйлдвэрлэлийг эдийн засгийн бие даасан салбар болгон хөгжүүлнэ” гэж, 9.5-д “соёлын аялал жуулчлал, бүтээлч үйлдвэрлэлийг хөгжүүлэх эрх зүйн орчныг бүрдүүлж, соёл, урлагийн зах зээлийг өргөжүүлэхэд салбар хоорондын уялдаа холбоог сайжруулна” гэж заасан. Соёлын яамнаас Монгол Улсын соёлын бүтээлч үйлдвэрлэлийн суурь судалгааг анх удаа хийлгэж, уг судалгаагаар соёлын бүтээлч үйлдвэрлэлийн ДНБ-д оруулж буй хувь нэмэр 481.4 тэрбум төгрөг буюу улсын дүнд 1.4 хувийг эзэлж байгааг тогтоосон. Тус салбарт 11 697 аж ахуйн нэгж, байгууллага бүртгэлтэйгээс 5665 нь идэвхтэй үйл ажиллагаа эрхэлж байна. 

Манай улсад соёлын салбарын үйл ажиллагааг зохицуулсан хууль тогтоомж үйлчилж байгаа боловч өөрийн орны өвөрмөц онцлогийг хадгалан, нөөц боломж, технологийн хурдацтай хөгжил, дижитал шилжилт зэрэг хүчин зүйлийг харгалзан үзэж давамгай соёлын нөлөөлөл болон дэлхийн эдийн засгийн өрсөлдөөнийг даван туулах, мэдлэгт суурилсан эдийн засгийг цогцоор нь төрийн бодлогоор дэмжих зохицуулалт хангалтгүй байна. Тиймээс Соёлын бүтээлч үйлдвэрлэлийг дэмжих тухай хуулийн төслийг боловсруулж, соёлын бүтээлч үйлдвэрлэлийг хөгжүүлэх, импортыг орлох, экспортод чиглэсэн нэмүү өртөг шингэсэн бүтээгдэхүүн, үйлчилгээний өрсөлдөх чадварыг нэмэгдүүлэх,  соёлын бүтээлч үйлдвэрлэлийг дэмжих хэлбэр, удирдлага зохион байгуулалтын эрх зүйн үндсийг тогтоохыг зорьжээ. Уг хуулийн төсөл батлагдсанаар соёлын бүтээлч үйлдвэрлэлийг хөгжүүлэх орчин бүрдэж, соёлын бүтээгдэхүүн, үйлчилгээг эдийн засгийн эргэлтэд оруулах үйл явц нэмэгдэнэ. Мөн төрөөс үзүүлэх дэмжлэгийн хэлбэр тодорхой болж, соёлын бүтээгдэхүүн, үйлчилгээг бүтээх, түгээхтэй холбоотой үе шат бүрд бүртгэл, мэдээллийн тогтолцоо нэвтэрч, соёлын нийгэм, эдийн засгийн ач холбогдлыг хэмжих боломж бүрдэнэ гэж үзэж байна. Түүнчлэн соёлын бүтээгдэхүүн, үйлчилгээний өрсөлдөх чадвар сайжирч, гадаад зах зээлд өрсөлдөх боломж бүрдэн, ажлын байр нэмэгдэж, Монгол хүний шавхагдашгүй баялаг оюуны бүтээлийг сурталчлах, эдийн засгийн өөрийгөө тэтгэх чадавхыг бүрдүүлэх юм.

Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10-т заасныг баримтлан Байнгын хороо хуулийн төслийг зүйл бүрээр хэлэлцлээ. Хэлэлцэж буй асуудалтай холбогдуулан асуулт асууж, үг хэлэх гишүүн байсангүй. Зарчмын зөрүүтэй санал тус бүрээр санал хураахад хуралдаанд ирсэн гишүүдийн олонх нь дэмжиж, хуулийн төслийг дэмжсэн тул чуулганы нэгдсэн хуралдаанд танилцуулахаар болов.

Боловсролын салбар дахь хүний эрхийн нөхцөл байдлын талаар хэлэлцлээ

Мөн өдрийн хуралдаанаар Байнгын хороо цаглавар батлах тогтоолын төслийг баталсан юм. Харин дараа нь Хүний эрхийн Үндэсний Комиссоос өргөн барьсан Монгол Улс дахь Хүний эрх, эрх чөлөөний байдлын талаарх 23 дахь илтгэлд боловсролын салбар дахь хүний эрхийн нөхцөл байдлын талаар тусгасан санал, дүгнэлт, мэдээллийг сонсож, хэлэлцлээ. Хүний эрхийн Үндэсний Комиссын дарга Д.Сүнжидийн танилцуулснаар бол Комиссын 23 дахь илтгэлд 7 бүлэг сэдвийн хүрээнд шийдвэр гаргуулахаар 54 саналыг УИХ-д өргөн барьжээ. Илтгэлийн хоёрдугаар бүлэгт боловсролын салбар дахь хүний эрхийн нөхцөл байдлын судалгааг оруулж, улмаар бодлогын шийдвэр гаргуулахаар 9 саналыг тусгасан. Монгол Улс 2023 оны байдлаар хүний хөгжлийн индексээр дэлхийн 189 орноос 96-д, боловсролын индексээр 189 улсаас 103 дугаар байрт эрэмбэлэгдэж байна. Боловсролын багц хуулийн 2023 оны цогц шинэчлэлтээр хүүхэд бүрд чанартай боловсрол эзэмших тэгш боломж бүрдэж, иргэд насан туршдаа суралцах эрх баталгаажиж, багш тасралтгүй хөгжих боломж нээгдэж, чадахуйн зарчимд суурилсан удирдлага, засаглалын тогтолцоо бэхжиж, чанар, үр дүн, гүйцэтгэлд суурилсан санхүүжилтийг нэвтрүүлж, орон зай, цаг хугацаанаас үл хамаарсан цахим боловсролын тогтолцоотой болж байгаа ч хүн амын амьжиргааны түвшин, хөдөлмөр эрхлэлт, шилжилт хөдөлгөөн, хот суурин газрын хүн амын хэт нягтрал, суурьшлын тархалтаас шалтгаалан боловсролын үйлчилгээг эрх тэгш, чанартай хүргэж чадахгүй байна. Стандартын шаардлага хангаагүй орчин нөхцөлтэй сургууль олон байгаа бөгөөд анги дүүргэлт нийслэл, орон нутагт тогтоосон нормоос хэтэрчээ. 

Сургуулийн өмнөх боловсролын байгууллагуудад ундны ус цэвэршүүлэх төхөөрөмж байршуулах, тоглоом, тоглоомын талбайн хүртээмж, аюулгүй байдлыг хангах, багш, ажилтнуудын тоог нэмэгдүүлж, багшийн хөгжлийг дэмжих шаардлагатай гэж үзжээ. Цэцэрлэгийн хоолны чанар, хүртээмж, нэр төрлийг олшруулж, тэжээллэг чанарыг нэмэгдүүлэхэд шаардагдах зардлыг эцэг, эх, асран хамгаалагчдын оролцоотой судалж, олон талын оролцоог хангасан байдлаар хэлэлцүүлэн шийдвэрлэх, өдөр өнжүүлэх үйлчилгээний шаардлага, стандарт, хуулийн зохицуулалт, хяналт тавих механизмыг бий болгож, зөрчлийг арилгах шаардлагатай. Боловсролын салбар дахь хүүхдийн эсрэг хүчирхийлэл, ялгаварлан гадуурхалт, дээрэлхэлт нь суралцагчдын эрхийг зөрчиж байгаа. Бүх түвшний боловсролын сургалтын байгууллагад орчны хүртээмжийг бий болгож, хөгжлийн бэрхшээлтэй хүүхдэд тулгардаг бэрхшээлийн талаар багш, ажилтнуудад мэдлэг, ойлголт олгох хэрэгцээтэйг, хувийн өмчийн боловсролын сургалтын байгууллага дахь хүүхдийн сурч боловсрох, хөгжих, ялгаварлан гадуурхалт, дарамт, хүчирхийллээс ангид байх эрх зөрчигдсөөр байгааг танилцуулав.

Монгол Улсын Яамны эрх зүйн байдлын тухай хуулийн 7 дугаар зүйлийн 7.1.1, 7.1.5, 7.1.9 дэх заалтад зааснаар боловсролын асуудал эрхэлсэн төрийн захиргааны төв байгууллага нь боловсролын тухай хууль тогтоомжийг боловсронгуй болгох, хэрэгжилтийг улсын хэмжээнд зохион байгуулах, хүний эрхийг хангах эдийн засаг, нийгэм, хууль зүйн болон бусад баталгааг бүрдүүлэх арга хэмжээ авах, боловсролын үйлчилгээ суралцагчийн хэрэгцээ, шаардлагад нийцэж, тэдний нэр төр, эрх чөлөөг хангаж байгаа эсэхэд хяналт тавих зохицуулалтыг тодорхой болгож, журамлах шаардлагатай гэсэн дүгнэлтийг хийжээ. Малчин өрхийн хүүхдүүд бага боловсролыг гэртээ ойр эзэмших, суралцагч цахим, зайны зэрэг бусад хувилбарт боловсрол эзэмших боломжийг бүрдүүлэх, сургуулийн орчинд ялгаварлан гадуурхалт, үе тэнгийн дээрэлхэлтээс урьдчилан сэргийлэх ажлыг эрчимжүүлэх, бодитой үр дүн гаргах шийдвэр гаргах зэрэг саналыг Хүний эрхийн Үндэсний Комисс илтгэлдээ тусгажээ. 

Илтгэлийн танилцуулгатай холбогдуулан Улсын Их Хурлын гишүүн Б.Баярсайхан, Ц.Мөнхцэцэг нар асуулт асууж, байр сууриа илэрхийлэв. “Монгол Улс дахь Хүний эрх, эрх чөлөөний байдлын талаарх 23 дахь илтгэл”-ийг хэлэлцээд, санал, дүгнэлтээ Хууль зүйн байнгын хороонд хүргүүлэхээр болсноор Байнгын хорооны энэ өдрийн хуралдаан 13 цаг 48 минутад өндөрлөлөө гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв. 

Улсын Их Хурлын Төрийн байгуулалтын байнгын хорооны өнөөдрийн /2024.04.24/ хуралдаанаар Монгол Улсын Их Хурлын тухай хуулийн шинэчилсэн найруулгын төсөл, Монгол Улсын Их Хурлын чуулганы хуралдааны дэгийн тухай хуулийн шинэчилсэн найруулгын төсөл,  Монгол Улсын Их Хурлын  хяналт шалгалтын тухай хуулийн шинэчилсэн найруулгын төсөл болон эдгээр хуулиудтай хамт өргөн мэдүүлсэн хуулийн төслүүдийн анхны хэлэлцүүлгийг явууллаа.

Монгол Улсын Их Хурлын гишүүн Н.Энхболд, Л.Мөнхбаатар, Г.Тэмүүлэн нараас 2024 оны 04 дүгээр сарын 05-ны өдөр Улсын Их Хуралд өргөн мэдүүлсэн Монгол Улсын Их Хурлын тухай хуулийн шинэчилсэн найруулгын төсөл, Монгол Улсын Их Хурлын чуулганы хуралдааны дэгийн тухай хуулийн шинэчилсэн найруулгын төсөл, Монгол Улсын Их Хурлын хяналт, шалгалтын тухай хуулийн шинэчилсэн найруулгын төсөл болон тэдгээртэй хамт өргөн мэдүүлсэн хууль, Улсын Их Хурлын тогтоолын төслүүдийн хэлэлцэх эсэх асуудлыг Төрийн байгуулалтын байнгын хороо 2024 оны 04 дүгээр сарын 11-ний өдрийн хуралдаанаар, Улсын Их Хурал 2024 оны 04 дүгээр сарын 11-ний өдрийн чуулганы нэгдсэн хуралдаанаар хэлэлцэж, анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлсэн.  

Монгол Улсын Их Хурлын даргын 2024 оны 04 дүгээр сарын 12-ны өдрийн 54 дүгээр захирамжаар Монгол Улсын Их Хурлын тухай, Монгол Улсын Их Хурлын чуулганы хуралдааны дэгийн тухай, Монгол Улсын Их Хурлын хяналт шалгалтын тухай хуулийн шинэчилсэн найруулгын төсөл болон хамт өргөн мэдүүлсэн хууль, Улсын Их Хурлын тогтоолын төслүүдийг Байнгын хороо болон чуулганы нэгдсэн хуралдаанаар хэлэлцүүлэх бэлтгэл хангах үүрэг бүхий ажлын хэсгийг Улсын Их Хурлын гишүүн Д.Тогтохсүрэнгээр ахлуулж, Улсын Их Хурлын гишүүн Х.Болорчулуун, Т.Доржханд, Б.Жаргалмаа, Б.Пүрэвдорж, Ж.Сүхбаатар нарын бүрэлдэхүүнтэйгээр байгуулсан билээ.

Ажлын дэд хэсэг 4, ажлын хэсэг 2 удаа тус тус хуралдсан бөгөөд төслүүдийг анхны хэлэлцүүлэгт бэлтгэсэн талаарх танилцуулгыг ажлын хэсгийн ахлагч Д.Тогтохсүрэн танилцууллаа.  

Тэрбээр, Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.9 дэх хэсэгт “Хэрэв тухайн хуулийн төсөлтэй холбогдуулан ажлын хэсэг байгуулсан бол тухайн ажлын хэсэг хуулийн төслийн талаарх тусгайлсан саналаа эрхлэх асуудал нь хамаарах Байнгын хороонд танилцуулна.” гэж заасны дагуу Улсын Их Хурлын “d.parliament.mn” цахим системд иргэдээс ирүүлсэн 1 санал, ажлын хэсгийн гишүүн Т.Доржханд, Б.Жаргалмаа, Ж.Сүхбаатар нараас ирүүлсэн 3, Улсын Их Хурлын гишүүн С.Одонтуяа, Г.Тэмүүлэн нараас болон Жендерийн үндэсний хорооноос ирүүлсэн саналуудыг үндэслэн ажлын хэсэг дараах саналыг гаргаж, Төрийн байгуулалтын байнгын хороонд танилцуулж байна гэлээ.

1.Монгол Улсын Их Хурлын тухай хуулийн шинэчилсэн найруулгын төслийн талаар 14, хамт өргөн мэдүүлсэн хууль, тогтоолын төслийн талаар 4, нийт 18 зарчмын зөрүүтэй саналын томьёолол, мөн найруулгын 5 саналын томьёолол бэлтгэжээ.

Улсын Их Хурал өөрийн стратеги төлөвлөгөөг баталж, хэрэгжүүлэх, Улсын Их Хурлын сонгуулийн дүнгээр нэг нам эвслээс албан ёсоор нэр дэвшиж 10 ба түүнээс дээш гишүүн сонгогдсон бол уг гишүүд нийлж нам, эвслийн бүлэг байгуулахаар, яллах дүгнэлт үйлдэж шүүхэд шилжүүлсэн эрүүгийн хэрэгтэй холбоотой асуудлаар Хянан шалгах түр хороог байгуулахгүй гэснийг яллагдагчийг шүүхэд шилжүүлснээс хойш 2 жил гэж тодорхой хугацаатай болгохоор саналын томьёолол боловсруулжээ. Түүнчлэн Ерөнхий сайд, Засгийн газрын гишүүний албан үүргийг хавсран гүйцэтгэж байгаа гишүүн хянан шалгах түр хорооны дарга, гишүүнээр ажиллахгүй байх, мөн Монгол Улсын Их Хурлын тухай хуулийн шинэчилсэн найруулгын төсөлтэй хамт өргөн мэдүүлсэн Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийг хууль санаачлагчид буцаах саналуудыг танилцуулсан.

2.Монгол Улсын Их Хурлын чуулганы хуралдааны дэгийн тухай хуулийн шинэчилсэн найруулгын төслийн талаар нийт 19 зарчмын зөрүүтэй санал, найруулгын 3, хамт өргөн мэдүүлсэн хуулийн төслийн талаар зарчмын зөрүүтэй 1 саналын томьёоллыг боловсруулсан бөгөөд дараах зарчмын өөрчлөлтүүдийг оруулжээ. Үүнд:

·      Ээлжит чуулганаар хэлэлцэх асуудлын жагсаалтад ороогүй хууль, тогтоолын төсөл өргөн мэдүүлснийг Зөвлөлийн саналыг харгалзан Төрийн байгуулалтын байнгын хороо хэлэлцэж, хуралдаанд оролцсон гишүүдийн олонх дэмжсэн бол чуулганаар хэлэлцүүлэх;

·      Хуулийн төсөл баталснаар улсын төсвийн орлогын хэмжээ буурах, зарлагын хэмжээ нэмэгдэхээр байвал энэ тухай Засгийн газрын саналыг заавал сонсох бөгөөд саналыг санхүү, төсвийн асуудал эрхэлсэн засгийн газрын гишүүн танилцуулах;

·      Төрийн байгуулалтын байнгын хороо Төрийн албан дахь жендэрийн эрх тэгш байдлын төлөв байдал, жендэрийн ялгаварлан гадуурхалт, бэлгийн дарамтаас урьдчилан сэргийлэх чиглэлээр авсан арга хэмжээний явц, үр дүнгийн талаарх Төрийн албаны зөвлөлийн тайланг 2 жил тутам хэлэлцэх;

·      Төсвийн байнгын хороо хууль тогтоомжоор хүлээсэн чиг үүргийн хэрэгжилтийн талаарх Төсвийн тогтвортой байдлын зөвлөлийн тайланг жил бүр хэлэлцэх саналыг танилцуулсан.

Мөн Монгол Улсын Их Хурлын тухай, Монгол Улсын Их Хурлын хяналт шалгалтын тухай хуулийн шинэчилсэн найруулгын төслийн талаар гаргасан зарчмын зөрүүтэй саналтай нийцүүлэн холбогдох саналуудыг боловсруулжээ.

3.Монгол Улсын Их Хурлын хяналт, шалгалтын тухай хуулийн шинэчилсэн найруулгын төслийн талаар Ажлын хэсгийн дэмжсэн 9 зарчмын зөрүүтэй болон найруулгын 3 багц саналын томьёоллыг бэлтгэсэн хэмээн Байнгын хорооны хуралдаанд танилцуулав.

Улсын Их Хуралд ирүүлдэг тайлан, илтгэл, мэдээллийн хамрах хүрээнд жендэрийн эрх тэгш байдлыг хангах зорилгоор төрийн албан дахь жендэрийн эрх тэгш байдлын төлөв байдал, жендэрийн ялгаварлан гадуурхалтаас сэргийлэх чиглэлээр авсан арга хэмжээний явц, үр дүнгийн талаарх болон Төсвийн тогтвортой байдлын зөвлөлийн тайланг сонсдог байхаар, Ерөнхий сайд, Засгийн газрын гишүүний албан үүргийг хавсран гүйцэтгэж байгаа гишүүн хянан шалгах түр хорооны дарга, гишүүнээр ажиллахгүй байх Хянан шалгах түр хорооны бүрэлдэхүүнд ажиллах гишүүдийг тоог шинээр тогтоох зэрэг саналыг боловсруулжээ.

Байнгын хороо Монгол Улсын Их Хурлын чуулганы хуралдааны дэгийн тухай хуульд заасны дагуу хуулийн төслүүдийг зүйл бүрээр нь хэлэлцсэн бөгөөд Ажлын хэсгээс танилцуулсан саналын томьёоллуудаар санал хураалт явуулан Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтлоо.

Дараа нь “Монгол Улсын засаг захиргаа, нутаг дэвсгэрийн нэгжийг өөрчлөх асуудлаар иргэдийн санал авах журам батлах тухай” Улсын Их Хурлын тогтоолын төслийн эцсийн хэлэлцүүлгийг явууллаа.

УИХ-ын чуулганы нэгдсэн хуралдааны анхны хэлэлцүүлгээр олонхын дэмжлэг авсан саналуудыг төсөлд нэмж тусган, төслийн агуулга, зарчмыг алдахгүйгээр үг хэллэг, дэс дараалал, бүтцийн шинжтэй засварыг хийж эцсийн хэлэлцүүлэгт бэлтгэсэн хэмээн хуралдаан даргалагч танилцуулав. Төслийн эцсийн хэлэлцүүлэгтэй холбогдуулан асуулт, санал гараагүй бөгөөд Байнгын хорооны танилцуулгыг чуулганы нэгдсэн хуралдаанд хүргүүлэхээр тогтлоо хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.

Нийслэлийн Засаг дарга бөгөөд Улаанбаатар хотын Захирагч Х.Нямбаатар өнөөдөр Европын Сэргээн Босголт Хөгжлийн Банкны Төв Азийн бүс хариуцсан захирал Сузанна Харгитай тэргүүтэй төлөөлөгчдийг хүлээн авч уулзлаа. Уулзалтаар Улаанбаатар хотод 2024-2028 онд хэрэгжүүлэхээр төлөвлөж буй төсөл хөтөлбөрүүдийн талаар мэдээлэл өгөхийн зэрэгцээ хамтран ажиллах боломжийн талаар санал солилцов.

Уулзалтын эхэнд Нийслэлийн Засаг дарга бөгөөд Улаанбаатар хотын Захирагч Х.Нямбаатар ирсэн төлөөлөгчдөд талархал илэрхийлэн, “Улаанбаатар хотын бонд босгох талаар болон нэн тэргүүнд шийдвэрлэх шаардлагатай сэргээгдэх эрчим хүчийг нэмэгдүүлэх, ачаа тээврийн нэгдсэн логистикийн төв байгуулах, нийслэлийн замыг сайжруулах, явган хүний болон дугуйн замын сүлжээг нэмэгдүүлэх, инженер, техникийн чиглэлийн албан хаагчдын ур чадварыг нэмэгдүүлж, чадавхыг бэхжүүлэх чиглэлд хамтран ажиллах сонирхолтой байна” хэмээлээ.

 Европын Сэргээн Босголт Хөгжлийн Банкны Төв Азийн бүс хариуцсан захирал Сузанна Харгитай Улаанбаатар хотын бондыг санхүүжүүлэх төсөл болон цаашдын олон төсөл хөтөлбөрүүдийг хамтран хэрэгжүүлэх боломжтой ба цаашид ч үргэлжлүүлэн үр дүнтэй хамтран ажиллана гэдэгт итгэлтэй байгаагаа илэрхийллээ.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Нийслэлийн Засаг дарга бөгөөд Улаанбаатар хотын Захирагч Х.Нямбаатар:

-Бид өнгөрсөн 30 жилийн хугацаанд аймаг, сумын төвүүд дэд бүтцийн нэгдсэн бодлоггүй явж ирлээ. 21 аймаг, Улаанбаатар хотод хог хаягдлаа шатаах нэг ширхэг үйлдвэр байхгүй. Лаг боловсруулах үйлдвэр Монгол Улсад нэг ч байхгүй. Лагаа бүгдийг нь ил хатаадаг. Өмхий, самхай үнэртэнэ. Иргэд өмхийгөө арилгаач ээ гэдэг. Сүүлийн 60 жил Сонсголон орчимд лагаа хатааж байхад бид яаж энэ үнэрийг арилгах юм бэ.

Үүнийг арилгахын тулд эрхзүйн үндэслэл, төрийн хувийн хэвшлийн түншлэл татварын орлого бүрдэж байж лаг шатаах, боловсруулах үйлдвэр барина. Бүх суурин газрууд лагаа хатааж байгаа. Би хотын дарга болоод очсон газар болгон лаг боловсруулах үйлдвэргүй, хог шатаах үйлдвэргүй, дэд бүтэц нь 60 жилээр хоцрогдсон нийт шугам сүлжээ нь 40 жилийн өмнө хийгдсэн. Нөгөөх нь хэзээ мөдгүй задардаг. Ийм л хотод хэдүүлээ амьдарч байна. Нэмэгдсэн өртгийн албан татварын тодорхой хувь байж замаа засна биз дээ.

Намайг гудамжаар явахаар залуучууд замаа засаач гээд орилоод байгаа. Мөнгө байхгүй юм чинь би яах вэ. Орлогын эх үүсвэрүүд орж ирж байж л энэ асуудлууд шийдэгдэнэ. Байгаа мөнгөө бүгдийг нь шавхаад метроныхоо төслийг урагшлуулсан.

Би ажил аваад 31 хууль өөрчлүүлсэн. Одоо ахиад 30 хууль өөрчлүүлнэ.