Зургадугаар сард 295,704 зөрчил бүртгэгджээ
Улсын хэмжээнд зургадугаар сард нийт 295,704 зөрчил бүртгэгдсэн нь өмнөх сартай харьцуулахад 20.8 хувиар буурсан үзүүлэлт юм. Бүртгэгдсэн зөрчлийн 78.2 хувь нь нийслэлд, 21.8 хувь нь орон нутагт байна. Эдгээр зөрчлийн 99.7 хувь нь цагдаагийн байгууллагын бүрэн эрхийн хүрээнд шийдвэрлэгдсэн бол 1.3 хувийг нь Гааль, Татвар, Гадаадын иргэн, харьяатын газар, Онцгой байдлын газар зэргээс шалгасан байна.
Мөн сард зөрчил гаргасан 293,904 хүнд шийтгэл оногдуулсан нь өмнөх сараас 21.2 хувиар, 1210 хуулийн этгээдэд шийтгэл оногдуулсан нь өмнөх сараас 3.8 хувиар тус тус буурсан үзүүлэлт юм. Шийтгэл оногдуулсан иргэдийн 73.4 хувь нь эрэгтэй, 26.6 хувь нь эмэгтэй байсан бол 61.2 хувь нь 26–45 насныхан байжээ. Зөрчлийн шийтгэлийг оногдуулахдаа 283,056 зөрчлийг газар дээр нь шийдвэрлэсэн. Үүнээс 2.6 хувь нь бүртгэлд авч хялбаршуулсан журмаар, 1.3 хувь нь шүүхээр шийдвэрлэгдсэн аж.
Зөрчлүүдийн улмаас 3.8 тэрбум төгрөгийн хохирол учирснаас 2.6 тэрбумыг нөхөн төлүүлжээ.
Зөрчлийн төрлийг өмнөх сартай нь харьцуулбал, хүний биед халдах зөрчил 45.5 хувиар, замын хөдөлгөөний хууль зөрчилт 44.4 хувиар, гаалийн хууль зөрчилт 43.3 хувиар, оршин суугчдын амгалан тайван байдлыг алдагдуулах зөрчил 41.6 хувиар, олон нийтийн газар зүй бусаар биеэ авч явах зөрчил 37.7 хувиар, төрийн албан тушаалтны үйл ажиллагаанд саад учруулах зөрчил 43.4 хувиар, хүүхдийн эрхийн зөрчил 40.7 хувиар, хулгайлах зөрчил 11.1 хувиар, мөрийтэй тоглох зөрчил таван хувиар тус тус өссөн бол танхайрах зөрчил 44.7 хувиар, гамшгаас хамгаалах хуулийн зөрчил 25 хувь, гэр бүлийн хүчирхийлэлтэй холбоотой зөрчил 0.4 хувиар бууржээ.
