"Ханжоу 2022" 3х3 сагсан бөмбөгийн төрөлд медаль хүртсэн баг тамирчдад хүндэтгэл үзүүллээ

Ханжоу 2022″ Азийн наадмын Монголын багийн ахлагч, МҮОХ-ны Гүйцэтгэх зөвлөлийн гишүүн А.Ганбаатар өнөөдөр 3х3 сагсан бөмбөгийн төрөлд медаль хүртсэн баг тамирчдыг хүлээн авч, хүндэтгэл үзүүлээ. “Ханжоу 2022” Азийн наадмын 3х3 сагсан бөмбөгийн төрөлд манай улсын эмэгтэй шигшээ баг мөнгөн медаль, эрэгтэй шигшээ баг хүрэл медаль тус тус хүртсэн.

Уулзалтаар Монголын багийн ахлагч А.Ганбаатар “Түүхэн амжилт гаргасанд 3х3 сагсан бөмбөгийн нийт баг тамирчиддаа халуун баяр хүргэе. Та бүхний амжилт монголын олон хүүхэд залууст үлгэр дуурайлал боллоо. Эерэг бүхнийг түгээн дэлгэрүүлж буйд дахин талархал илэрхийлье” хэмээн онцлон цаашдын тэмцээн уралдаанд нь амжилт хүслээ.

ЭХ сурвалж: МҮОХ