Өмнөд Солонгосын Тээврийн яам “Aero Mongolia” компанийг торгожээ

БНСУ-ын Тээврийн яам “Vietnam Airlines” болон “Aero Mongolia” компаниудыг агаарын тээврийн хуулийг зөрчсөн хэргээр торгосон байна. Вьетнамын нисэхийн компанийг 25 сая, “Aero Mongolia” компанийг 10 сая воноор торгожээ.

“Vietnam Airlines” компанийн онгоц долоодугаар сарын 14-ний өдөр Ханой хотоос Бусан хотын Гимхэ олон улсын нисэх буудалд хүрэх замдаа Инчоны нисэх буудалд түр газардсан байна. Ингэхдээ тус онгоц тав гаруй цаг Инчоны нисэх буудалд байрласан тул торгууль оногдуулсан аж.

Өмнөд Солонгосын Нисэхийн бизнесийн тухай хуулийн дагуу олон улсын нисэх онгоцны буудалд зорчигчтой онгоц дөрвөн цагаас илүү хугацаанд хөдөлгөөний бүсэд байрлахыг хориглодог байна.

Харин “Aero Mongolia” компани долоодугаар сарын 1-нээс хойш Инчон-Улаанбаатарын чиглэлд зөвшөөрөлгүй нислэг хийсэн тул 10 сая воны торгууль тавьжээ.

Эх сурвалж: Korea Times