Монгол Ардын намын дарга, Ерөнхий сайд Л.Оюун-Эрдэнэ 70,000 гаруй иргэд, сонгогчтой уулзаад байна

Монгол Ардын намын дарга, Ерөнхий сайд Л.Оюун-Эрдэнэ сонгуулийн сурталчилгаа эхэлснээс хойших 16 хоногийн хугацаанд 12,100 км зам туулж, 21 аймаг, нийслэлийн дүүргүүд, салбарын төлөөлөлтэй нийт 51 удаагийн уулзалтаар 70,000 гаруй иргэд, сонгогчтой уулзаад байна.

Тэрбээр Хан-Уул дүүргийн иргэд сонгогчидтой өнөөдөр уулзаж, 2024 оны УИХ-ын сонгуулийн онцлог, Үндсэн хуульд өөрчлөлт оруулж, холимог тогтолцоонд шилжсэнээр Монгол Улс анх удаа 126 гишүүнтэй парламенттай болж, нийгмийн төлөөлөл нэмэгдэх боломж бүрдсэн талаар танилцууллаа. Мөн “Сонгуулийн үед түр зуурын үйл явдал, худал сурталчилгаа, жижиг гомдол, мөнгөөр үнэт зүйлээ сольж болохгүй. Авлигатай нам харгалзалгүй тэмцэхэд та бидний хамтын эр зориг туйлын чухал. Таны оролцоо бол эх орныхоо эдийн засгийн тусгаар тогтнолыг бэхжүүлэх “Шинэ сэргэлтийн бодлого”-ын салшгүй нэг хэсэг юм. Тиймээс Монгол Ардын намаас Хан-Уул дүүрэгт нэр дэвшиж байгаа Ж.Алдаржавхлан, Л.Нинжжамц, Т.Мөнхсайхан нарыг багаар нь дэмжиж, эхлүүлсэн ажлыг нь үргэлжлүүлээрэй” гэлээ.

Монгол Ардын намын энэ удаагийн сонгуульд дэвшүүлсэн мөрийн хөтөлбөр бодитой, жагсаалт, тойрогт нэр дэвшиж буй хүмүүс нэр цэвэр, эв нэгдэлтэй, ажил, мэргэжлийн өндөр туршлагатай байгаа учраас Монгол Ардын намын нэр дэвшигчдийг багаар нь сонгохоо Хан-Уулчууд илэрхийлж байна.

Бүсчилсэн хөгжил, хотын шинэ төлөвлөлтийн дагуу Хан-Уул дүүрэгт “Солонго-1, 2” хороолол, БНСУ-ын хөрөнгө оруулалтаар 5,002 айлын жишиг хорооллын төсөл хэрэгжиж байна. “Яармаг” дэд төв, гэр хорооллын бүсэд нийгмийн болон инженерийн дэд бүтэц хийгдэж буй юм.

Ирэх дөрвөн жилд Монгол Ардын нам Улаанбаатар хотын авто замын сүлжээний ачааллыг бууруулж, Туулын авто замыг Нисэхийн хурдны авто замтай холбож, наадамчдын авто зам дээгүүр Наадамчдын гүүр барихаар мөрийн хөтөлбөртөө тусгажээ. Мөн Богд хааны ордон музейн орчмыг VIII Богд Жавзандамба хутагтын амьдарч ирсэн түүх, соёлд тулгуурлан төрөлжүүлэн хөгжүүлнэ. Туул усан цогцолбор төсөл хэрэгжүүлэн ундны усны баталгааг хангах юм.

Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурдтай, сайн ажиллаж байгаа учир бодлогоо үргэлжлүүлэх ёстой. Үүнд УИХ-ын сонгуулийн 12 дугаар тойрог, Хан-Уул дүүрэгт Монгол Ардын намаас нэр дэвшиж буй Ж.Алдаржавхлан, Л.Нинжжамц, Т.Мөнхсайхан нар хүч нэмж, мөрийн хөтөлбөрөө биелүүлж ажиллах учиртайг Хан-Уулчууд нэр дэвшигчдэд захиж байв.