Допингийн эсрэг байгууллагын ЕНБД Н.Ариунзаяа: Допингийн шинжилгээний дөрвөн сорьц эерэг гарсан
Үндэсний их баяр наадмыг зохион байгуулах комиссоос допингийн шинжилгээний хариуг олон нийтэд танилцууллаа.
Энэ талаар мэдээллийн эхэнд Үндэсний бөхийн салбар хорооны дарга Н.Мягмар:
-Энэ жилийн допингийн шинжилгээ авах үйл ажиллагааг хуулийн дагуу зохион байгуулж дуусгасан. Дөрөв буюу түүнээс дээш давсан 32 бөх болон 16 харваачаас допингийн шинжилгээ авсан. Шинжилгээний сорьц авах явцыг тагнуул, цагдаа, холбогдох байгууллагууд хяналт тавьж ажилласан.
Үндэсний бөхчүүдээ допинг хэрэглэхээс урьдчилан сэргийлэх, энэ спортыг үнэн шударга явуулахын тулд Бөхийн салбар хороо хичээн ажиллаж ирсэн. Энэ утгаараа шинжилгээг олон улсын дүрмийн дагуу явуулах үүднээс холбогдох хүмүүст сургалтыг зохион байгуулж ажилласан. Энэ спортыг шударга, ариун байлгах тал дээр авч хэрэгжүүлж буй арга хэмжээ юм гэв.
Монголын үндэсний допингийн эсрэг байгууллагын Ерөнхий нарийн бичгийн дарга Н.Ариунзаяа шинжилгээний хариуг танилцууллаа.
Монголын үндэсний допингийн эсрэг байгууллагын Ерөнхий нарийн бичгийн дарга Н.Ариунзаяа:
-Монголын үндэсний допингийн эсрэг байгууллага хуулийн хүрээнд сорьцыг авч, допингийн эсрэг шинжилгээг зохион байгууллаа. Герман улсын Дрезден хотын лабораторид нийт 48 сорьцыг долоодугаар сарын 14-ний өдөр хүргүүлсэн. Шинжилгээний хариуг 48 цагийн дотор гаргуулахаар ажилласан. Тус лабораториос долоодугаар сарын 15-ны орой 22:00 цагт цахим шуудангаар нийт 44 сорьцын хариуг Монголын үндэсний допингийн эсрэг байгууллагад ирүүлсэн. Энэхүү 44 сорьцод допингийн төрлийн хориотой бодис илрээгүй.
Харин дөрвөн сорьц ирээгүй байна. Энэ сорьцууд нь эерэг гарсан. Гэхдээ шууд допингийн төрлийн бодис илэрсэн гэж хэлж болохгүй. Нарийвчлан шинжилгээ хийх шаардлага гарсан. Нарийвчилсан шинжилгээний хариу яг хэдийд гарахыг бид тодорхойлох боломжгүй. Ойролцоогоор 14-21 хоног сунжирч магадгүй юм. Сэжигтэй тохиолдол гэдэг нь допингийн төрлийн бодис тухайн хүний биед яаж орсноос шалтгаалан нарийвчилсан шинжилгээгээр үгүйсгэгдэх тохиолдол байдаг. Хэрвээ сорьц эерэг гарсан тохиолдолд тухайн тамирчдад танилцуулж “Б” сорьц өгөх эсэхээ шийдвэрлэх ёстой. Дараа нь нэрсийг зарлах эрх зүйн зохицуулалттай. Ер нь допинг илэрсэн, илрээгүй гэж хэлэх эрт байна.
Бөх, харваачдын хэнийх нь сорьц эерэг гарсныг одоогоор хэлэх боломжгүй юм. Яагаад гэхээр шинжилгээний хариу дандаа кодоор ирж байгаа. Хүний нэр харахгүй. Хүний нэртэй хэсэг нь битүүмжлэгдээд хадгалагдаж байгаа. Тэгэхээр эерэг гарсан сорьцын тэд нь бөхчүүдийнх, харваачдынх гэж хэлэх боломжгүй” гэв.
About Author
