BBC: Монгол Улс бас нэр хүндтэй ардчилсан улс

BBC “Даваа гарагт Путиныг хүлээж байгаа Монголын нийслэл дэх Засгийн газрын цогцолборын дэргэд Украиныг дэмжих жагсаал боллоо” гэсэн тайлбартайгаар энэхүү зургийг Путины улаан хивсэн дээгүүр шөнө алхаж буй зургийн хамт нийтэлж “Путиныг Улаанбаатарт ирсний дараахан Украины ГХЯ-ны хэвлэлийн төлөөлөгч Георгий Тихи Монголын эрх баригчдын Оросын ерөнхийлөгчийг Олон улсын эрүүгийн хуулийн дагуу баривчлахгүй гэсэн шийдвэрийг буруушаав” хэмээн мэдээлэв.

Мөн Украины ГХЯ-ны төлөөлөгч “Telegram” хуудсандаа нийтэлсэн мэдэгдэлдээ “Путиныг баривчлах НҮБ-ын Олон улсын эрүүгийн шүүхийн заавал биелүүлэх үүргээ биелүүлэхгүй байгаа нь ОУЭШ болон олон улсын эрүүгийн эрхзүйн тогтолцоонд хүнд цохилт боллоо. Монгол Улс яллагдагчийг шүүхээс мултрах боломжийг олгож, улмаар цэргийн гэмт хэргийн хариуцлагыг хуваалцах болов. Энэ явдалд нь Улаанбаатарт хариуцлага тооцуулахын тулд бид түншүүдтэйгээ хамтран ажиллах болно гэж дурджээ” хэмээн мэдээлжээ. BBC бас НҮБ-ын ОУЭШ-ийн хэвлэлийн төлөөлөгч доктор Фади Эль-Абдалла “Тус шүүхийн гишүүн орнууд “Ромын дүрэм” гэсэн IX бүлгийн дагуу ажиллах үүрэгтэй.

Гэхдээ энэхүү гэрээ нь гишүүн орнууд өөр улсын өмнө хүлээсэн “өмнөх гэрээний үүргээ зөрчих” эсвэл гуравдагч улсын төлөөлөгчдийн “дипломат халдашгүй эрхийг зөрчих” тохиолдолд үүрэг хариуцлагаас чөлөөлөгдөж болно” гэсэн заалттай. Хэрэв гарын үсэг зурсан улсууд хамтран ажиллаагүй тохиолдолд уг асуудлыг нарийвчлан судалж, үүний дараа оролцогч бүх улс орноос бүрдсэн чуулган санал хурааж, зайлшгүй шаардлагатай тохиолдолд зөрчил гаргагчид арга хэмжээ авч болно” гэж хэлснийг дурдаад “ОУЭШ нь өөрийн гэсэн хууль хяналтын байгууллагагүй. Сэжигтнүүдийг тус шүүхийн гишүүн орнууд нутаг дэвсгэр дээрээ баривчилдаг бөгөөд үүнд эдгээр улсын эрх баригчдын хүсэл зориг шаардлагатай болдог. 2023 онд В.Путин БРИКС-ийн дээд хэмжээний уулзалтад уригдсан ч Ромын дүрмийг баталсан Өмнөд Африкт очоогүй. Өмнөд Африкийн ерөнхийлөгч түүнээс өөрийн улсад хүрэлцэн ирэхгүй байхыг тусгайлан хүссэн билээ. Украинд бүрэн хэмжээний дайн эхлүүлснээс хойш Путин гадаадад ойр ойрхон аялах болсон бөгөөд түүний очиж байсан бүх улс ОУЭШ-ын харьяаллыг хүлээн зөвшөөрдөггүй улс байсан юм. Харин Монгол Улс 2002 онд НҮБ-ын ОУЭШ-ийн дүрмийг хүлээн зөвшөөрсөн. Монгол Улс бас нэр хүндтэй ардчилсан улс” гэж мэдээлсэн байна.