У.Хүрэлсүх, Кишида нарын уулзалтыг "NHK" онцлов

Япон, Монгол хоёр улс батлан хамгаалахын салбарт хамтран ажиллах гэрээ хэлэлцээнд оройтолгүйгээр гарын үсэг зурах хэрэгтэй гэдэгт санал нэгдсэн талаар “NHK” агентлаг мэдээлжээ. Тодруулбал, хоёр улсын удирдагчид Нью-Йорк хотноо үргэлжилж буй НҮБ-ын Ерөнхий ассамблейн чуулганы хүрээнд уулзахдаа энэ талаар санал нэгдсэн байна.

Монгол Улсын Ерөнхийлөгч Ухнаагийн Хүрэлсүх, Японы ерөнхий сайд Фүмио Кишида нар Ням гаригт уулзахдаа “Мөргөлдөөн, хуваагдал гүнзгийрч буй цаг үед эрх зүйт засаглалд суурилсан нээлттэй бөгөөд чөлөөт олон улсын дэг журмыг сахин хамгаалах, бэхжүүлэх нь чухал” гэдгийг харилцан нотолжээ. Мөн хоёр улсын хамтын ажиллагааг цаашид стратегийн тусгай түншийн хувиар өргөжүүлэхээр тохиров. Батлан хамгаалахын техник, технологи дамжуулах тухай хэлэлцээрийг засгийн газрууд зарчмын хувьд тохиролцсоныг тэд сайшаажээ.

Талууд энэ үеэр Хойд Солонгосын талаар дурдаад, НҮБ-ын Аюулгүйн зөвлөлийн тогтоолыг бүрэн дагаж мөрдөхийг уриалахын тулд нягт хамтран ажиллана гэдгээ баталжээ. Хойд Солонгост хулгайлагдсан япон иргэдийн асуудлыг Монгол Улс ойлгож, хамтран ажиллаж байгаад Фүмио Кишида талархал илэрхийлсэн байна.

ЭХ СУРВАЛЖ: NHK