Эрдэс баялгийн мэргэжлийн зөвлөлийн гишүүдийн томилгоо, шийдвэр гаргалтад дүн шинжилгээ хийв

Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2024 оны 9 дүгээр сарын 23-27-ны өдрүүдэд авлигын шалтгаан, нөхцөлийг арилгах чиглэлээр “Эрдэнэс таван толгой” ХК-ийн Төлөөлөн удирдах зөвлөлийн болон Эрдэс баялгийн мэргэжлийн зөвлөлийн гишүүдийн томилгоо, цалин, урамшуулал олголт, ажлын байрны тодорхойлолт, гэрээ, Байгаль орчны хяналтын улсын байцаагчийн эрх, зөвшөөрөл олгох үйл ажиллагаанд баримтлах дүрэм, журам, тэдгээрийн хэрэгжилтэд тус тус дүн шинжилгээ хийв.

Төрийн байгууллага, албан тушаалтны батлан гаргасан тушаал, шийдвэр, журам, дүрмийг хянах хүрээнд Санхүүгийн зохицуулах хорооны “Үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрөл, зөвшөөрөл, эрх, олголт, бүртгэлийн журам”, “Тохиромжтой этгээдийг тодорхойлох журам”, Зам, тээврийн сайдын “Авто замын санд хөрөнгө төвлөрүүлэх, захиран зарцуулах журам”, “Эрдэнэс Монгол” хувьцаат компанийн “Цалин хөлсний журам” зэрэг эрх зүйн актуудыг хянаж, санал хүргүүлэв.

“Тусгайлсан чиг үүрэг бүхий байгууллагад шүгэл үлээгчийг хамгаалах эрх зүйн орчин, хэрэгцээ шаардлага манай улсын нөхцөл байдал, түүнийг өөрчлөх боломж, олон улсын сайн туршлага” сэдэвт хэлэлцүүлгийг 2024 оны 9 дүгээр сарын 26-ны өдөр “Олон нийтийн төв”-д зохион байгуулав. Хэлэлцүүлэгт Батлан хамгаалах яам, Хүний эрхийн Үндэсний Комисс, Зэвсэгт хүчний жанжин штаб, Онцгой байдлын ерөнхий газар, Хил хамгаалах ерөнхий газар, Монголын сэтгүүлчдийн нэгдсэн эвлэл, Монголын Хуульчдын холбоо, Монголын өмгөөлөгчдийн холбооны төлөөлөл оролцож, шүгэл үлээгчийн эрх зүйн байдлын ерөнхий хуулийг батлуулахдаа үндэсний аюулгүй байдалд хамаарах асуудлаар шүгэл үлээсэн үед хамгаалах зохицуулалтыг нарийвчлан тусгах, цэргийн болон бусад холбогдох хуульд нэмэлт өөрчлөлт оруулах, шүгэл үлээгчийг хамгаалах хараат бус нэгжтэй байх зэрэг асуудлаар санал нэгдэв.

Өнгөрсөн долоо хоногт авлигын эсрэг хууль тогтоомжийн талаарх мэдлэг олгох сургалтыг нийт 251 хүнийг хамруулан зохион байгууллаа.