“Сибирийн хүч-2 төслийн талаар асар их хэлэлцээ хийх шаардлагатай”
“CNPC” Эдийн засаг, технологийн судалгааны хүрээлэнгийн ерөнхийлөгч Лу Рукуан
Оросын Сибириэс Хятад руу хий дамжуулах хоолой барих төсөл нь асар их ажил, ажлын байр, хэлэлцээ шаарддаг гэж Хятадын ахлах судлаач өнөөдөр (2025.12.11) мэдэгджээ.
Сүүлийн жилүүдэд Москва “Сибирийн хүч-2” хоолой барих гэрээг Бээжинтэй эцэслэн байгуулахын тулд шаргуу ажиллаж байна. ОХУ-ын ерөнхийлөгч Владимир Путин есдүгээр сард Хятадад айлчлах үеэрээ уг хоолойг барих хууль ёсны хүчин төгөлдөр санамж бичгийг танилцуулсан. Гэсэн хэдий ч Бээжин уг гэрээний талаар олон нийтэд цөөн хэдэн удаа л мэдэгдэл хийсэн юм.
Энэ талаар Хятадын төрийн газрын тосны компанийн судалгааны салбар болох “CNPC” Эдийн засаг, технологийн судалгааны хүрээлэнгийн ерөнхийлөгч Лу Рукуан 2025 оны Олон улсын эрчим хүчний гүйцэтгэх захирлуудын форум дээр үг хэлэхдээ, Сибирийн хүч гэх мэт аварга том хийн төслүүдэд дор хаяж 8-10 жил шаардлагатай гэж мэдэгджээ.
Мөн “S&P Global Energy” компанийн дэд дарга Даниел Ергин хэлэхдээ, “Орос улс хоёр орны хамтын ажиллагаа эсвэл сайн харилцаанд нийцэх уг хоолойг барихаар шийдсэн мэт харагдаж байгаа. Гэсэн хэдий ч үүнийг барихад хүмүүсийн бодож байгаагаас ч удаан хугацаа шаардагдана” гэжээ. Тэрбээр “Магадгүй боловсруулах шаардлагатай олон нарийн ширийн зүйл байгаа байх. Гэхдээ Орос, Хятадын хамтын ажиллагаа ямар ч байсан тэд хийн үнэ ямар байх ёстой талаар санал нийлэхгүй байгаа” гэж нэмж дурдсан байна.
Орос улс 2019 оны сүүлээр зүүн Сибириэс Хятад руу хий нийлүүлж эхэлсэн. Тухайлбал, энэ онд төлөвлөсөн 38 тэрбум куб метр хүчин чадалдаа хүрнэ гэж тооцоолж байгаа “Сибирийн хүч 1” хоолойгоор дамжуулан хий нийлүүлж эхэлсэн. Путин есдүгээр сард Хятадад айлчлах үедээ энэ хоолойгоор нэмэлт зургаа тэрбум куб метр хий нийлүүлэхээр тохиролцсон. Үүнээс гадна Хятад улс Номхон далайн Сахалин арлаас Алс дорнодын замаар Оросоос жилд нэмэлт хоёр тэрбум куб метр импортлохоор тохиролцсон байна. Энэ нь 2027 онд эхэлж, жилд 12 тэрбум куб метрт хүрэхээр төлөвлөгджээ.
