“Үндэсний бахархал – Агуу өв” сэдэвт энх тайвны бага хурал зохион байгуулагдлаа
Өнгөрсөн 6-р сарын 21-ний өдөр “Үндэсний бахархал – Агуу өв” сэдэвт энх тайвны бага хурал Туушин зочид буудалд зохион байгуулагдлаа.
HWPL олон улсын энх тайвны ТББ-аас зохион байгуулсан энэхүү бага хуралд Монгол Улсын төр, нийгмийн зүтгэлтнүүд, ахмад дайчид, энхийг сахиулагчид, боловсрол, хууль, залуучууд зэрэг салбар бүрийн төлөөлөл оролцсон юм.
HWPL байгууллага нь өнгөрсөн оны 10 сараас эхлэн Монгол Улс дахь үйл ажиллагаагаа албан ёсоор идэвхжүүлж, төр нийгмийн зүтгэлтнүүдтэй хамтран, энх тайвны соёлыг түгээн дэлгэрүүлэх үйлсэд иргэний нийгмийн идэвхтэй оролцоог ханган олон талт үйл ажиллагааг зохион байгуулсаар байгаа.
“Үндэсний бахархал – Агуу өв” энх тайвны бага хуралд зориулан Румын Улсын Ерөнхийлөгч асан Эмиль Константинеску, Олон улсын энх тайвны эрх зүйн хорооны (ILPC) гишүүн, профессор Кирон Бөрк нар видео мэндчилгээ илгээсэн юм.
Ерөнхийлөгч асан Эмиль Константинеску Монголчууд тэр дундаа Монголын залуучуудад хандаж хэлэхдээ “Та бүхний энх тайвны төлөөх эрэлхийлэл магтууштай, чухал хэдий ч саад бэрхшээл олон бий. Хэрэв та бүхэн энэхүү эрхэм зорилгынхоо төлөө тууштай зүтгэж, хичээнгүйлэн ажиллавал замд таарах бэрхшээл хүндрэлийг ажрахгүй давж чадна гэдэгт би итгэлтэй байна” хэмээгээд энх тайвныг тогтоох үйлсэд Монголын ард түмний гаргаж буй хичээл зүтгэл, санал санаачилгыг дэмжиж буйгаа илэрхийлсэн юм.
Харин профессор Кирон Бөрк “Бидний ийнхүү цуглан, нэгдмэл үзэл бодол, алсын хараагаа илэрхийлж байгаагийн гол зорилго бол улс орнуудад DPCW тунхаглалыг улсын болон олон улсын хэмжээнд дэмжихийг уриалах юм. Ийм л дэмжлэг бидний ирээдүйд амар тайван нийгмийг цогцлооход үнэтэй хувь нэмэр болж чадна” хэмээв.
Бага хурлын үеэр ахмад дайчин Т.Батсуурь “Монгол Улсын баруун хил хязгаарыг хамгаалахын тулд олон аавын хүүхдүүдийн цус урсаж, олон аав ээжийн нулимс урссан…” хэмээн дайны хор уршиг, гуниг харууслын талаар дурсан ярьсан нь энх тайвны үнэ цэнийг улам бүр мэдрүүлж өгсөн цаг мөч байлаа.
Бага хуралд хүрэлцэн ирсэн энхийг сахиулагч, хошууч генерал Я.Чойжамц “HWPL байгууллагын зохион байгуулж буй өнөөдрийн энх тайвны бага хурлаар дэлхий нийтийн тулгамдсан асуудал болох дайн тулаанаас ангижрахын тулд үүний аюул занал, хор хохирлыг олон нийтэд таниулан ойлгуулах замаар аймшигт үйлдлээс хол байлгах гэсэн зорилгод чиглэж байгаад үнэхээр сэтгэл таатай байна” хэмээлээ.
Монгол Улсын Шадар сайд асан, МХЭАХНҮХ-ны ерөнхийлөгч Ц.Оюунбаатар бага хуралд тавьсан илтгэлдээ “Хууль дээдлэх ёс” бага хурал, “Монголын ирээдүй-Залуусын оролцоо” 1000 залуучуудын чуулган, DPCW тунхаглалын 10 дахь жилийн ойд зориулсан “Монгол бахархал” энх тайвны алхалт зэрэг HWPL байгууллагын энх тайвны үйл ажиллагаанууд нь Монгол Улсад энх тайвны ойлголт, үнэ цэнийг улам бүр нэмэгдүүлсээр байгааг дурдсан юм. Мөн “HWPL байгууллагын Энх тайвныг хуульчлах төсөл нь манай улсад бодит үйл хэрэг болсноор бид энх тайвныг сурч, дараа нь энх тайвныг хайрлан, эцэст нь энх тайвнаар амьдрах амар амгалан нийгмийг үр хойчдоо үлдээнэ гэдэгт гүнээ итгэж байна” хэмээн онцлон дурдлаа.
Мөн эх орны ирээдүй хойч болсон залуусын төлөөлөл болон IPYG нийгэмлэгийн гишүүн М.Хулан илтгэл тавьж “Залуучууд бидний оролцоо, дуу хоолой нийгэмд чухал нөлөөтэй бөгөөд маргаашийн зөрчлөөс урьдчилан сэргийлэхийн тулд өнөөгийн залуусын сэтгэлгээг өөрчлөх нь чухал. Залуучууд бид эх орноо хайрлах, ахмадаа хүндлэх, хүний эрх шударга ёсыг дээдлэх, хуулиа чандлан сахих, талархах, хуваалцах, хамтач, найрсаг энх тайванч сэтгэлгээтэй байж, энх тайвны үйл хэрэгт идэвх санаачилгатай оролцдог байх нь юу юунаас илүү эрхэм” хэмээгээд залуучуудыг амар тайван нийгмийг цогцлооход хувь нэмрээ оруулахыг уриалав.
Бага хурлыг хааж HWPL байгууллагын Глобал-9 салбарын захирал хатагтай Кейт Шин үг хэлэхдээ “Монгол Улсын соёл, түүх энх тайвны хөгжил дэвшлийн агуу нөөц бололцоог дэлхий дахинаа таниулж, монголчуудын энх тайвны соёлын өвийг түгээн дэлгэрүүлэх болно” гээд энх тайвны үйл хэргийг дэмжиж бага хуралд хүрэлцэн ирсэн зочид төлөөлөгчдөд талархлаа илэрхийлсэн юм.
HWPL байгууллагаас тунхагласан “Дайныг зогсоож, энх тайвныг тогтоох тунхаглал (DPCW)” нь тогтвортой энх тайвныг цогцлоохын төлөө улс орнууд хэрхэн хамтран ажиллаж, зөрчил мөргөлдөөнийг энхийн замаар шийдвэрлэх арга зарчмуудыг агуулсан байдаг.
Өнгөрсөн хугацаанд HWPL байгууллагын Монгол Улсад хэрэгжүүлж буй энх тайвны үйл ажиллагаагаар дамжуулан, DPCW тунхаглалын чухал ач холбогдлыг ойлгон дэмжиж буй Монголын 10,000 гаруй иргэн уг тунхаглалыг НҮБ-д өргөн барихад уриалж “Энх тайвны захидал”-ыг бичсэн. Мөн 18 мянган иргэн DPCW тунхаглалыг олон улсын хууль болгон батлахыг дэмжиж буйгаа илэрхийлэн гарын үсэг зурсан байна.
About Author
