Галд шатсан 60 айлын орон сууцны гадна фасадыг ГАЛЫН АЮУЛТАЙ ХӨӨСӨНЦӨРӨӨР хийсэн байжээ

Баянзүрх дүүргийн 26 дугаар хороонд гарсан гал түймэрт
өртсөн барилга, байгууламжийн нэгдсэн дүгнэлт гуравдугаар сарын 15-ны дотор гарах талаар Нийслэлийн удирдах ажилтнуудын шуурхай зөвлөгөөний үеэр мэдээлсэн байна. 58 айлаар төлөвлөсөн барилгад нэмэлтээр дөрвөн айл төлөвлөсөн. Зураг төсөлгүй, үндсэн барилгын хийцлэлээс өөр материалаар хийжээ.
Барилгуудад нийт найман төрлийн үзлэг хийж, сорьц авч,
хэмжилт хийж дууссан. Галд өртсөн таван объектод дүгнэлт гарна. 207-р байрыг 58 айлаар төлөвлөсөн ч техникийн давхарт 2018 онд нэмэлтээр дөрвөн айл төлөвлөсөн, зураг төсөлгүй, үндсэн барилгын хийцлэлээс өөр материалаар хийсэн. Сургууль, цэцэрлэгийн барилгыг 206 дугаартай барилгатай хүзүүвчээр холбосон, голд байрлах барилгад сургалтын танхим, хоолны заалтай. 207, 208-р байрыг 2015 оны зургаар 2017 онд Улсын комисс хүлээж авсан. Тус барилгууд өөр газар баригдсан ч комиссын нэг дүгнэлттэй байсан.
Галын аюултай хөөсөнцрөөр гадна фасадыг хийжээ.
207-р барилгын хойд болон зүүн тал, урд талын зүүн хэсгийн гадна хөөсөнцөр фасад галд ертсен, техникийн давхрын зүүн талд байрлах өргөтгөлийн талбай бүрэн шатсан. Гадна фасадны материалын хувьд галын аюултай 15кг/м3 нягттай хөөсөнцрөөр хийсэн. Нэгдүгээр давхарт чулуун хөвөн дулаалга, чулуун хавтан фасад шатаагүй үлдсэн, бусад ашигласан материал бүрэн шатсан байдалтай. Галын улмаас хагарсан цонхуудыг нөхжээ.
830-р барилгын зүүн хойд хэсэгт байрлах үйлчилгээний талбай галд өртсөн. Барилгын гадна талын гоёлын өрөгт хийц бүхий баганыг дэлбэрэлтийн хүчинд шидэгдсэн ёмкос мөргөж гэмтээсэн. Тус барилгын гуравдугаар орцны зүүн хойд хэсэгт байрлах 1-6 дугаар давхрын айлуудын цонх дэлбэрэлтийн долгионы хүчинд хагарсан. Дэлбэрэлтийн улмаас нийт 85 айлын цонх хагарч, гэмтсэн бөгөөд хоёр болон гуравдугаар орцны 1-6 давхрын айлуудын цонхыг бүрэн сольж дууссан.
Долоогоос дээш давхрын айлуудын цонхны шилийг солилоо. Хохирлын хэмжээ, сэргээн засварлах өртөг, зардлыг Барилга хөгжлийн төвөөс гуравдугаар сарын 1-ний дотор гаргах ёстой.
Барилгын чанар, аюулгуй байдлын дүгнэлт, дээж, сорьцын
хариу гарсны дараа барилгын байцаагчийн ерөнхий дүгнэлт гарна. Гуравдугаар сарын 15-ны дотор нэгдсэн дүгнэлтийг гаргахаар ажиллаж байна хэмээв.
Хотын дарга ослын хор хохирлыг бууруулах, дахиж осол
гарахгүй байх нөхцөлийг бүрдүүлэх, иргэдийг орон сууцанд оруулах ажлыг эрчимжуулэх үүрэг өгсөн юм.