Дорноговь аймаг орон нутагт анх удаа эрэгтэйчүүдийн үзлэгийн кабинет нээлээ

Дорноговь аймгийн эмнэлэгт урологи, андрологийн 2 эмч бэлджээ. Гэвч кабинет байгуулагдаагүй, бэлтгэгдсэн эмч нар хавсарсан ажил гүйцэтгэх болоод байв. Тэгвэл өнөөдөр /2024.02.21/ Дорноговь аймгийн Нэгдсэн эмнэлгийн амбулаторийн тасагт “Дэзэрэт” Олон Улсын Энэрлийн байгууллагын дэмжлэгтэйгээр Эрэгтэйчүүдийн эрүүл мэндийн өвөрмөц хэрэгцээ шаардлагыг хангасан стандартын Урологийн кабинет шинээр нээсэн байна. Энэ нь Монгол Улсын хувьд орон нутгийн 21 аймагтаа анхдагч кабинет болсноороо онцлогтой юм байна.

2023 оны тоо баримтаар Монгол Улсын нийт хүн амын 49 хувийг эрэгтэйчүүд эзэлдэг бол Дорноговь аймгийн нийт хүн амын 50,9 хувийг эрэгтэйчүүд эзэлж байна.

Эрчүүд эрүүл мэнддээ төдийлөн анхаардаггүй, урьдчилан сэргийлэх үзлэгт хамрагддаггүй, ажлын ачаалал, стресс, хэт удаан суудаг болон доороосоо их даардаг ажил эрхэлдэг, хөдөлгөөний дутагдал, буруу хооллолт, хорт зуршил зэрэг олон шалтгааны улмаас өвчилдөг. Тэдний эрүүл мэндийн өвөрмөц эрэлт хэрэгцээг хангасан нарийн мэргэжлийн тасаг, кабинет, мэргэжлийн эмчийн хангамж хангалтгүй байдаг.