Энэтхэг улс зэсийн салбарт хамтран ажиллахаа илэрхийлжээ

Улаанбаатар, 2024 оны гуравдугаар сарын 11

Энэтхэг Улс Монгол Улстай зэсийн салбарт хамтран ажиллахаа илэрхийлэв.

Энэ талаар Бүгд найрамдах Энэтхэг улсын Уул уурхайн яамны нарийн бичгийн дарга В.Л.Кантха Рао манай улсын УУХҮ-ийн дэд сайд Б.Уянгатай уулзах үеэр ярилцсан байна. Тэрбээр, БНЭУ-ын зэс хайлуулах үйлдвэрүүд нь зэсийн баяжмалын импортоос ихээхэн хамааралтайг онцолж, Монгол Улстай Засгийн газар хоорондын түвшинд хамтран ажиллах сонирхолтой байгаагаа илэрхийлсэн юм.

Энэтхэг улс зэс хайлуулах үйлдвэрүүддээ зэсийн баяжмалын тогтвортой нийлүүлэлтийг хангахын тулд Монгол Улстай хамтран ажиллахыг ийнхүү эрмэлзэж байгаа нь хоёр орны эдийн засгийн харилцааг бэхжүүлэх боломжийг олгож байна гэдгийг УУХҮ-ийн дэд сайд Б.Уянга хэллээ.

Энэтхэгийн зэсийн томоохон ордууд нь бүгд улсын төрийн мэдлийн “Хиндустан коопер” компанид харьяалагддаг байна Тус компани нь өөрөө зэс хайлуулах үйлдвэртэйг тэрбээр мэдээллээ.

Төрийн мэдлийнхээс гадна тус улсад мөн зэс хайлуулах хувийн олон үйлдвэр ажиллаж, Африк тивийн улсуудаас баяжмалаа авдаг байна. Монгол Улс биржээр дамжуулан зэсийн баяжмалаа цахимаар арилжиж эхлэх гэж буйтай холбоотойгоор Энэтхэгийн талтай мэдээлэл солилцож, гуравдугаар сарын 18-нд Монгол Улсад болох зэсийн баяжмалын цахим арилжааны талаарх анхны уулзалтад Энэтхэгийн талыг танхимаар болон цахимаар оролцохыг урьсан.

Саналыг таатай хүлээн авсан гэв. БНЭУ-ын талаас мөн литийн хайгуулыг хамтарч хийх санал тавьсныг төрийн өмчийн уул уурхайн компаниудыг нэгтгэж буй “Эрдэнэс Монгол” компанид уламжилсныг дэд сайд Б.Уянга хэллээ.

Хоёр талын уулзалт Канад улсын Торонто хотноо өнгөрсөн 7 хоногт болсон олон улсын эрдэс баялаг, уул уурхайн салбарын чуулганы үеэр болсон юм.