“А” үсгийн үнэ 8 сая төгрөг болжээ
Сүүлийн өдрүүдэд нэгдүгээр ангийн үсэглэлийн баяраар хүүхдээ”А” үсэг болгох эрхийг нь эцэг, эхчүүд найман сая төгрөгөөр худалдаж авдаг гэх мэдээлэл цахим орчинд цацагдлаа. Уг мэдээлэл иргэдийг талцуулж маргаан үүсгээд байгаа юм.
Уг нь сурагчид уншиж, бичиж сурснаа эцэг эхчүүд, багш нартаа тайлагнах гэж “Эрдмийн баяр”- хийдэг. “А” үсгийн төлөөх өрсөлдөөн гараагүй байхад хүүхдээр өөрөөр нь үсэг сугалуулах нь хамгийн шударга арга байлаа.
Гэтэл одоо 35 үсэг өөр өөрийн үнэлгээтэй болжээ. Тухайлбал, “А” үсэг найман сая, бусад үсэг ч өөр өөрийн үнэлгээтэй байна. Хамгийн доод тал нь 200 мянга гэнэ. Эрдмийн баяр биш бэл бэнчингийн өрсөлдөөн болох нь. Нэгэнт л мөнгөөрөө өрсөлдөх гэж байгаа бол “А” үсгийг дуудлага худалдаан оруулъя. Манай монголчууд тоонд ихээхэн ач холбогдол өгдөг сонирхолтой хүмүүс шүү дээ. 9911-тээ дугаар, автомашины азын дугаарыг хүртэл дуудлага худалдаанд оруулаад хэдэн зуун саяар авчихдаг. Тэгвэл одоо “А” болон бусад үсгийг дуудлага худалдаанд оруулж сургуулийн их засвар болох хана, тааз, дээвэр, будгийнхаа мөнгийг ольё. Анги тэнхим засварлах урсгал зардлаа хэдэн үсгийнхээ дуудлага худалдаагаар босгоод авчихъя.
About Author
