ЗГ: 25 тэрбумаар онцгой байдлын байгууллагад дрон, робот авна

Засгийн газрын ээлжит хуралдаанаас гаргасан шийдвэрийг өнөөдөр /2024.04.24/ танилцууллаа.

Шадар сайд С.Амарсайхан:

-Салбарын асуудалтай холбоотой мэдээллийг хүргэе. Засгийн газраас үндэсний гамшигтай тэмцэх, салбарын байгууллагын чадавхыг нэмэгдүүлэх чиглэлээр олон ажил хийж байгаа. Стандарттай эрсдэлийг бууруулах хэд хэдэн стратегийг боловсруулж, танилцуулж байгаа. Энэ дагуу зарим шийдвэрийг гаргалаа. Үүний нэг нь 25 тэрбум төгрөгөөр онцгой байдлын байгууллагын алба хаагчдын хувцас хэрэгсэл, тоног төхөөрөмж, бааз суурийг нэмэгдүүлж, сайжруулахаар улсын төсөвт тусган шийдвэрлэлээ. Мөн онцгой байдлын байгууллагын хүний нөөцийн чадавхыг нэмэгдүүлэхээр сургалт зохион байгуулахаар төлөвлөж байна. Мөн чадварыг нь нэмэгдүүлэхээр одоо байгаа эрэн хайх аврах, гал түймэртэй тэмцэх нэгж бүлгийн тоог нэмэгдүүлэх асуудлыг ярилаа. Үе үеийн Засгийн газар бүтэц орон тоог нэмэгдүүлж ирсэн ч улсын хэмжээнд алба хаагчдын хүний нөөц 60 хувь дутуу явж байгаа. Өөрөөр хэлбэл, нийт байх ёстой алба хаагчдын тоог хүн амын тоотой харьцуулахад улсын хэмжээнд 60 хувь дутуу байгаа гэж ойлгож болно. Машин механик нь 60 хувь хангагдсан байгаа юм. Одоо 10 хүн тутмын гурав нь зориулалтын хувцастай байгаа нь үнэн. Алба хаагчид нэг дор бүгд дайчлагдан ажилладаггүй учраас сөрөг талаас нь ойлгож болохгүй. Алба хаагчдын цалин хангамжийн хувьд 2025 оны төсөвт нэгж ангиудыг 128-аар нэмэгдүүлж, тэр хэмжээгээр төсвөө нэмнэ гэсэн үг. Одоо улсын 330 сумын 30-д нь аврах анги байдаг учраас эрсдэлийг бууруулах бодлоготой нийцэхгүй байгаа учраас энэ асуудлыг танилцуулсан.

Өнгөрсөн хоёр жилийн хугацаанд хоёр удаа цалин нь нэмэгдэж байсан. Сүүлд долоо хоногийн өмнө цалин нь дунджаар 25 хувиар нэмэгдсэн. Хоёрт, ОБЕГ-ын сургалт, нарийн мэргэжлийн боловсон хүчнийг нэмэгдүүлэхэд анхаарна. Цалин нэмэгдэж байгаа ч нийгмийн асуудал нь чухал байгаа. Орон сууцжуулах бодлогыг хэрэгжүүлнэ.

Зарим нэг орон тоог баталж, шаардлагатай төсвийг батлах үүргийг өгсөн. Жишээлбэл, гал унтраах дрон, робот, тоног төхөөрөмжөөс гадна гал сөнөөгчдийн олон улсын стандартад нийцсэн хувцас авахад 25 тэрбум төгрөгийг зарцуулна. Энэ долоо хоногоос нийлүүлэлтийг хийнэ.

Онцгой байдлын байгууллага одоо гар утас, олон нийтийн сүлжээгээр урьдчилан сэргийлэх мэдээллээ хүргэдэг бол удахгүй зарлан мэдээлэх шинэ системийг нэвтрүүлэхээр 30 сая ам.долларын төслийг хэрэгжүүлэхээр УИХ-ыд санхүүжилтын хэлэлцээрийг соёрхон батална. Үндэсний гамшгийн удирдлагын төвийг байгуулах ажил энэ жилээс эхэлнэ.

Хоёрт, өнгөрсөн нэгдүгээр сарын 24-нд Баянзүрх дүүрэгт газ тээвэрлэж явсан машин дэлбэрсэн ноцтой осол гарсан. Хамтарсан ажлын хэсгийн дүгнэлтүүд эцэслэн гарсан. Тухайлбал, 207 дугаар байрыг буулгаж, шинээр барих, газрыг чөлөөлөх, аюулгүй болгох шаардлагатай болсон. Тухайн байрны оршин суугчдын асуудлыг нийслэлийн удирдлагад шилжүүлж, үүнд шаардлагатай 2.9 тэрбум төгрөгийг нийслэл рүү шилжүүлсэн. Засгийн газраас энэ осолтой холбоотой таван тэрбум төгрөгийн санхүүжилтыг шийдсэн. Үүний 2.1 тэрбум төгрөг нь айл өрхүүдийн түрээсийн орон сууц, алба хаагчдын орон байрны асуудлыг шийдсэн бол одоо 2.9 тэрбум төгрөгийг нийслэл рүү шилжүүлсэн гэсэн үг. Иргэд нийслэлийн удирдлагатай зөвшилцөж байрны асуудлаа шийднэ. Өндөр барилгад гарсан галыг унтраах өндөр шаттай машин одоогоор байхгүй. Удахгүй энэ төрлийн машиныг худалдаж авна. Дрон гэхэд хүн очих боломжгүй, тодорхой хязгаарлалттай газрын галыг унтраана. Өндөр барилгад гарсан галыг унтраана гэж байхгүй.

“УЛСЫН ЗЭРЭГЛЭЛТЭЙ 4 ХОТ, 19 АЙМГИЙН ТӨВИЙГ ОРОН НУТГИЙН ЗЭРЭГЛЭЛТЭЙ ХОТ БОЛГОНО”

Түгжрэлийг бууруулах үндэсний хорооны дарга, сайд Б.Дэлгэрсайхан:

-Хот тосгоны эрх зүйн байдлын тухай хуулийн төслийг боловсруулж, танилцууллаа. УИХ-аас 2019 онд Үндсэн хуульд оруулсан нэмэлт өөрчлөлтөөр улсын болон орон нутгийн зэрэглэлтэй хот тосгоны эрх зүйн байдал, эрхийг шилжүүлэх хууль зүйн үндсийг тусгаж өгсөн. Ингэснээр улсын болон орон нутгийн зэрэглэлтэй хот тосгоны нутаг дэвсгэр, удирдлагын нэгжийг шилжүүлэх боломжтой болсон.

Тодруулбал, улсын зэрэглэлтэй хот дөрөв, орон нутгийн 19 аймгийн төвийг орон нутгийн зэрэглэлтэй хот болгохоор шийдвэрлэлээ. Мөн хуучин байсан том сумдыг хот гэж нэрлэхээр хуульд өөрчлөлт оруулсан.

Замын-Үүд, Даланзадгад, Цогтцэций, Ханбогдыг хот болгож, төрийн үйлчилгээ очоогүй Ханги-Мандал, Гашуунсухайт, Шивээхүрэн боомт төвлөрсөн газруудыг тосгон болгоно. Нийслэлийн дагуул хот болох Шинэ Зуунмод хотын эрх зүйн байдлын тухай хуулийг хамт өргөн мэдүүлж, УИХ-аар батлуулахаар болж байна.

“100 МЯНГААС ДЭЭШ ХҮН АМТАЙ БОЛ УЛСЫН ЗЭРЭГЛЭЛТЭЙ ХОТ БАЙНА”

Хотын дарга Х.Нямбаатар:

-Бид зөвхөн аймгийн төвийг хот гэж нэрлээд бүх суурин газруудыг тосгон гэж нэрлээд хот нийтийн аж ахуйн асуудал шийдэгдэхгүй. Тиймээс хотын эдийн засгийн асуудлыг давхар хөндсөн. Тухайлбал, шинэ нисэх буудлыг түшиглэж, Шинэ Зуунмод хотын эрх зүйн байдлын тухай хуулийн төслийг өргөн барьж байгаа. Тодруулбал, 31.5 мянган га газарт шинэ хот байгуулж, корпорацийн зарчмаар оршин тогтнож, татварын орлогын 20 хувийг орон нутагт өгч, 80 хувиараа хот өөрөө хөгжих боломжийг гаргасан. Татварын хувьд НӨАТ-ын тодорхой хувийг эсвэл аж ахуйн нэгжийн орлогын албан татварын 60 хүртэлх хувийг хот суурин газруудад төвлөрүүлж авдаг эрх зүйн үндсийг бүрдүүлж өгнө. Иргэд аятай таатай нөхцөлд амьдрах болно. Улсын бүх боомт газрууд хот суурины зохион байгуулалтгүй байгаа. Хүн амын тоо, цаашид хөгжих нөхцөл байдлыг харгалзан хот тосгон байгуулна. Эрдэнэт, Дархан, Багахангай, Багануур улсын зэрэглэлтэй хот.

Цаашид 100 мянгаас дээш хүн амтай бол улсын зэрэглэлтэй, 30 мянгаас дээш бол орон нутгийн зэрэглэлтэй хот байна. Цаашид шинээр байгуулах Хархорин хотыг улсын зэрэглэлтэй хот гэж төлөвлөсөн.

Улаанбаатар хотын төвийн зургаан дүүргийн засаг захиргааны нэгж дээр 14 орон нутгийн зэрэглэлтэй хот байгуулж, 42 хороо бүхий эрх мэдэлтэй нэгж байгуулна. Засаг захиргааны татвар авах, хөгжлөө тодорхойлох, төсөв хуваарилах, өмч хөрөнгөө зарцуулах эрхтэй. Эдгээр эрхийг хот тосгодод шилжүүлж, нийслэлийн зарим чиг үүргийг 14 хот, шинэ хороодод шилжүүлнэ. Тосонцэнгэл, Хархорин, Зүүнхараа, Замын-Үүдийг хот болгоно. Өнгөрсөн 34 жилийн хугацаанд нийслэл өөрийн нийт эдэлбэр газраас 684 мянган га газрыг иргэн, аж ахуйн нэгжид олгосон байна лээ. Энд БОАЖЯ-ны газар олголт ороогүй. Монгол орны сүүлийн 30 жилийн суурин соёл иргэншлийн амьдралын хэв маягийг өөрчлөх асар чухал хуулийн төсөл танилцуулж байхад өөр асуудлыг жичдээ ярьмаар байна гэв.

Эх сурвалж: Nnews.mn