“Морьтой аравт”-ыг багаар нь дэмжиж, шинэ сэргэлт авчрахыг уриаллаа

УИХ-ын сонгуулийн II тойрогт Монгол Ардын намаас нэр дэвшигчид олон ястны өлгий Ховд аймагт сонгуулийн сурталчилгааны хаалтаа хийлээ. Баруун бүсэд Монгол Ардын намаас нэр дэвшиж буй “Морьтой Аравт” баг сурталчилгааны энэ өдрүүдэд нийт 36 мянган км зам туулж, дөрвөн аймгийн 122 мянган иргэнтэй уулзан, Бүсчилсэн хөгжлийн реформыг танилцуулжээ.

Баруун бүсийн Увс, Ховд, Завхан, Говь-Алтай аймаг 10 мандаттай бөгөөд Монгол Ардын намаас Д.Амарбаясгалан,С.Бямбацогт, Ч.Хүрэлбаатар, Б.Чойжилсүрэн, Б.Баярсайхан, Ц.Цэрэнпунцаг, Э.Болормаа, С.Энхболд, З.Мэндсайхан,Б.Заяабал нар нэр дэвшиж байгаа юм.

Баруун бүсийн “Морьтой Аравт”-ын сонгуулийн сурталчилгааны хаалтын үеэр Монгол Ардын намын Ерөнхий нарийн бичгийн дарга Д.Амарбаясгалан үг хэллээ.

Монгол Ардын намын Ерөнхий нарийн бичгийн дарга Д.Амарбаясгалан:

-Баруун бүсийн өрсөлдөх чадварыг нэмэгдүүлж, бусад аймгийн хэмжээнд хүргэх зорилго дэвшүүлэн энэ удаагийн сонгуульд оролцлоо. Баруун бүсийн хөгжлийн үндсэн тулгуурыг үйлдвэр, технологийн парк, түүгээр дамжуулан мал аж ахуй, хөдөө аж ахуй, аялал жуулчлалын салбарын хөгжлөөр бодитой болгохыг бид мөрийн хөтөлбөртөө тусгасан.

Ингэснээр энэ бүс нутагт ажлын байр нэмэгдэж, зах зээлийн эргэлт сайжран, ард иргэдийн амьдралын чанар дээшлэх юм.

Монгол Улсын нэг иргэнд ногдох дотоодын нийт бүтээгдэхүүн 6000 ам.доллар байгаа бол баруун бүс нутагт 3500 ам.доллар байна. Тиймээс баруун бүс нутгийн дэд бүтцийн асуудлыг бүрэн шийдвэрлэж, аймгуудын хөгжлийг жинхэнэ утгаар нь бий болгохоор ажиллах болно. Тухайлбал, баруун бүсийн аймгийн төвүүдийг авто замаар холбох, аймгийн төвөөс боомтууд хүртэл авто замаар холбох, аймгийн төвөөс сумд руу авто замаар холбох ажлыг эхлүүлэхээр мөрийн хөтөлбөртөө тусгалаа.

Та бүхний мэргэн сонголт дан ганц Ховд аймагт хамааралтай биш Увс, Завхан, Говь-Алтайчуудын төлөөх сонголт байх болно. Бүсчилсэн хөгжлөөр эдгээр аймгийн хөгжлийг бодож сонголтоо хийх цаг боллоо. Хуучин 30 жилд эцсийн цэгийг хатгаад, шинэ 30 жилийн эх үндсийг цутгах нь ард түмний сонголт.

Шударга нийгмийг бүтээх шинэ цагийг эхлүүлсэн Ерөнхий сайд Л.Оюун-Эрдэнийн багийг багаар нь дэмжиж, иргэн бүрийн эрх тэгш боломжийг хүлсэн авлигын гинжийг тасалж, шинэ түүхээ бүтээх хүсэл, мөрөөдөл бүхнээ нэгтгэх нь ард түмний сонголт байх болно гэдгийг онцлоод “Морьтой Аравт”-ыг багаар нь дэмжиж, бүс нутагтаа шинэ сэргэлт авчран, баруун бүсийнхээ ирэх жилүүдийн хөгжлийг тодорхойлохыг хүслээ.