Н.Учрал: Төрийн тэргүүн байсан Х.Баттулга “Төгрөг нуур” ордоо төрд өгөхөөс Баялгийн сангийн хэлэлцээр эхэлнэ
УИХ-ын чуулганы нэгдсэн хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг үргэлжлүүлэн хэлэлцэж байна. Тайлантай холбоотойгоор гишүүд асуулт асууж, хариулт авч байна.УИХ-ын гишүүн Ө.Шижир: Засгийн газрын хяналт хэрэгжүүлэх газар гээд яам байгаа. УИХ-ын Тамгын газар яг адилхан дүгнэлт хийдэг хэрнээ газар тэнгэр шиг дүгнэлт хийсэн байна. Амьдралын чанар ба дундаж давхарга гэдэг хэсэгт халамжийн үйлчилгээ ил тод нээлттэй болно гэдгийг Хяналт хэрэгжүүлэх газар 90 хувь гэж дүгнэсэн бол УИХ-ын Тамгын газар 30 хувь гэж дүгнэсэн. Залуучууд бизнес эрхлэхэд бүх төрлийн дэмжлэг туслалцаа үзүүлэх орчныг бүрдүүлнэ гэдгийг Засгийн газар 90, УИХ 30 хувь гэж дүгнэсэн байна. Төрийн бүтээмжийг дээшлүүлнэ гэдгээ 100 хувь гэж дүгнэсэн. Гэтэл өнөөдөр төр бүтээмжтэй ажиллаж чадаж байна уу. Төрийн өмчит компаниудын тавхан хувь ашигтай ажилласан. Үнэхээр 100 хувь ажилласан болоод 100 хувь гэж дүгнээд байгаа юм уу. Засгийн газар болон УИХ хариулж өгнө үү. 206 дугаар тогтоолоор дүгнэж байж яагаад газар тэнгэр шиг дүгнэлт хийгээд байгаа юм бэ. Нэг бол хуулиа хоёр өөрөөр ойлгоод байдаг юм уу?Эдийн засаг, хөгжлийн сайд Л.Гантөмөр: Энэ дээр манай хуулиудын уялдаа холбооны алдаа дутагдал энэ дээр гараад байгаа юм. Өнөөдөр бид хөгжлийн бодлого төлөвлөлт, түүнийхээ хэрэгжилтийг ярьж байгаа бол Бодлого төлөвлөлт түүний удирдлагын тухай хуулиа л баримаар байгаа юм. Энэ хуулийг барихаар Тамгын газар дүгнэлт гаргана гэдэг зүйл энэ хуульд байхгүй. Нэг журам байхгүй өөр өөр байдлаар үнэлбэл өөр өөр үнэлгээ гарна.Өнөөдөр амьдрал муу байна, хэцүү байна гэж байна. Үүнийг мэдэж байгаа учраас засъя гээд урагшаа алхаж байгаа. Хамгийн гол нь нэгдсэн платформ, олон улсын аргачлал хэрэгтэй. Энэ бүхнийг одоо хийж байна.УИХ-ын Тамгын газрын дэд дарга Ү.Амарбат: Засгийн газраас 206 дугаар тогтоолд ямар зорилтыг хэрхэн үнэлэхийг маш тодорхой заасан.УИХ-ын гишүүн П.Сайнзориг: Засгийн газрын үйл ажиллагааны хөтөлбөр юун дээр алдаж, онож байгааг дүгнэж чадвал бид ажлаа урагшлуулж чадна. Төсвийн гүйцэтгэлийг ч энэ зарчмаар явах ёстой. Гэтэл гүйцэтгэл, тайлангаа сонсохдоо гурилдаж байна. Маш энгийн байлгамаар байна. Өөрсдөө ойлгохгүй аргачлал ярьдаг. Тайланг тоон болон тодорхой үзүүлэлтээр гаргаж чаддаггүй.Баялгийн сан чинь амилах юм уу. Баялгийн сан гэхээр нэр бүхий орд заагаад яриад байх юм. Бусад стратегийн орд чинь яригдах юм уу. Хэлэлцээр хийх юм уу, ямар байдалтай яваад байгаа юм бэ. Сайдаасаа даваад БЭТ гээд нэг нөхөр орилоод байна. Жагсана ч гэнэ үү. Хэн гэдэг сайд ахалж байгаа юм бэ?ЗГХЭГ-ын дарга Н.Учрал: Үндэсний баялгийн сангийн тухай хуулийн ажлын хэсгийг би ахалж байгаа. 39 ордыг стратегийн ордод бүртгэ гэдгийг УИХ шийдчихээд байхад 18 жил хав дарсан. Энэ хугацаанд энэ ордуудыг гадаадын иргэдэд зарсан, ашиг хонжоо олсон. Энэ асуудал дээр хэлэлцээр хийж байгаа. Хэлэлцээр гэдэг бол хэрүүл, тулган шаардалт биш.Төрийн тэргүүн байсан Х.Баттулга Үндэсний баялгийн сангийн хуулиа хэрэгжүүлж ордуудын 34, 51 хувийн төрд авъя гээд хөдөө орон нутгаар яриад явж байгаа. Үгээрээ биш үйлдлээрээ үзүүлэх хэрэгтэй. Тантай нэр холбогддог “Төгрөг нуур”-ын ордыг бид ярих цаг ирсэн. Адилхан ярина. Эдийн засаг хөгжлийн сайд Л.Гантөмөр: Бид өнгөрсөн хугацааны бурууг нэг рүүгээ чихэж болохгүй. Сая Н.Учрал сайд алдаа гаргаж байна. Х.Баттулга Ерөнхийлөгч бол хөдөөгүүр яваад Баялгийн санг хэрхэн амилуулах талаар хэлэлцүүлэг хийж байгаа. Гэтэл тэрийг улстөржүүлээд, бүгдэд хамаатай энэ тэр гээд л. Ингээд Монголыг хуваадаг, дайсагнуулдаг юмаа аль аль түвшиндээ болох хэрэгтэй.
About Author
