“АН-ын бүлэг парламентын үйл ажиллагаанд оролцохгүй, хариуцлагыг нь МАН-ын бүлэг хүлээнэ”
УИХ дахь Ардчилсан намын бүлгээс үүсээд буй цаг үеийн асуудлаар мэдээлэл хийв.
УИХ-ын гишүүн, Ардчилсан намын дарга О.Цогтгэрэл:
-Бид үдээс өмнө тодорхой байр сууриа илэрхийлсэн. Хоёр даргын асуудлыг хамтад нь хэлэлцэж, огцруулах хүсэлтээ би УИХ дахь АН-ын бүлэгтээ танилцууллаа. Бүлгийн 34 гишүүн оролцсоноос 33 гишүүн миний саналыг дэмжлээ.
Нэгдүгээрт, Чуулганы хуралдааны хэлэлцэх асуудлын тов, дараалалд Ерөнхий сайд болон УИХ-ын даргыг нэгэн зэрэг дарааллуулж оруулсан тохиолдолд УИХ дахь АН-ын бүлгийн гишүүд хуралд чуулганд оролцож, огцруулахыг дэмжсүгэй.
Хоёрдугаарт, УИХ-ын даргын асуудлыг хэлэлцэх асуудлын тов дараалалд оруулахгүй бол АН-ын бүлгийн гишүүд парламентын үйл ажиллагаанд оролцохгүй. Үүнээс гарах үр дагаварыг МАН-ын бүлгийн гишүүд хүлээнэ гэдгийг сануулсугай гэсэн шийдвэр гарлаа.
Одоо УИХ-ын даргад бүлгийн шийдвэрээ танилцуулна. Бид асуудлыг 2/3-оос дээш тоогоор шийдвэл манай намын бусад гишүүн өөр байр суурь илэрхийлэх эрхгүй. Ийм дүрэм АН-д байдаг. Гишүүд энэ шийдвэрийг 100 хувь даган биелүүлэхгүй бол нам дүрмийн дагуу хариуцлага хүлээлгэнэ.
