ГЕГ: 2025 онд эм, биобэлдмэлийн хяналттай холбоотой 321 зөрчлийг илрүүлж, хуулийн дагуу хариуцлага хүлээлгэсэн байна
Монгол Улсын Засгийн газрын 2011 оны 73 дугаар тогтоолоор Эм, эмнэлгийн хэрэгслийг “Чингис хаан” олон улсын нисэх буудал дахь гаалийн газар, Сүхбаатар, Алтанбулаг, Замын-Үүд, Гашуунсухайт, Ханги боомтоор тус тус нэвтрүүлэхээр зохицуулсан.
Сүүлийн жилүүдэд эм, эмнэлгийн хэрэгсэл, эмийн түүхий эд, эрүүл мэндийн нэмэлт бүтээгдэхүүнийг улсын хилээр хууль бусаар нэвтрүүлэх тухайлбал тусгай зөвшөөрөлгүй иргэн хувийн хэрэглээнээсээ хэтрүүлж их хэмжээгээр нэвтрүүлэх, эмийн болон эрүүл мэндийн нэмэлт бүтээгдэхүүнийг бүртгэлгүй, зориулалтын бус тээврийн хэрэгслээр тээвэрлэх зэрэг зөрчлүүд түгээмэл бүртгэгдэж байна.
Тодруулбал, 2025 оны байдлаар гаалийн байгууллага эм, биобэлдмэлийн хяналтын чиглэлээр 321 зөрчил илрүүлж, 9 аж ахуйн нэгж, 312 иргэнд Зөрчлийн тухай хуулийн дагуу хариуцлага хүлээлгэсэн байна.
Иймд иргэд та бүхэн улсын хилээр нэвтрэхдээ “Гаалийн тухай хууль”-н 227 дугаар зүйлд заасан шаардлагуудыг дагаж мөрдөх, эм, эмнэлгийн хэрэгслийг импортлогч аж ахуйн нэгжүүд доорх хууль тогтоомжийг хэрэгжүүлэн, мөрдөж ажиллахыг гаалийн байгууллагаас анхааруулж байна! Үүнд:
“Зөвшөөрлийн тухай хууль”-ийн 8.1 дүгээр зүйлийн 13.17, 13.18 дахь заалт, “Эм, эмнэлгийн хэрэгслийн тухай хууль”-н 6 дугаар зүйлд заасны дагуу тусгай зөвшөөрөлтэйгөөр, тус хуулийн 15 дугаар зүйл, 41 дүгээр зүйлд зааснаар Монгол Улсад үйлдвэрлэх, импортлох, худалдах, эм, эмийн түүхий эд, эрүүл мэндийн нэмэлт бүтээгдэхүүнийг улсын бүртгэлд бүртгүүлж, эмийн асуудал хариуцсан төрийн захиргааны байгууллагаас 1 удаагийн мэдүүлэг /хуучин нэршлээр лиценз/ авсан байх шаардлагатай.
Дээрх шаардлагаас гадна мэдүүлэгч мэдээллийнхээ үнэн зөвийг нотлох зорилгоор “Гаалийн тухай хууль”-ийн 60 дугаар зүйлийн 60.3-т заасан бичиг баримтыг хавсаргах шаардлагатайг анхаарна уу.
