Удаа дараа мэдэгдэл өгсөн гражуудыг албадан буулгаж байна гэв

Нийслэлийн газар зохион байгуулалтын албанаас нийтийн эзэмшлийн зам талбайг чөлөөлж байгаатай холбоотой мэдээлэл өглөө. Тодруулбал, энэ онд 121 байршилд 1500 граж буулгахаар төлөвлөсөн байна.

Ингэхдээ мөн 15 мянга орчим метр хашаа, хайс буулгана гэсэн юм.

Мөн зам талбайг чөлөөлсөн байршилд дахин газар олгохгүй бөгөөд зөвхөн нийтийн эзэмшлийн зориулалтаар ашиглана гэдгээ онцоллоо. Газар чөлөөлөх тухай хугацаатай мэдэгдэх хуудсыг зөвшөөрөлгүй обьекттой бүх байршилд хүргүүлсэн бөгөөд 2023-2024 онд удаа дараа тавьсан шаардлага биелүүлээгүй иргэдийн гражийг шууд албадан буулгаж байгаа аж.

Өнөөдрийн тухайд Чингэлтэй дүүргийн хоёрдугаар хороонд зөвшөөрөлгүй барьсан 15 гражийг буулган, газар чөлөөлж байна гэв. Энэ онд тус дүүргийн есөн байршилд 63 граж, 27 байршилд 1737 метр хашаа хайс чөлөөлөх аж. Нийтийн эзэмшлийн талбайд тохижилтыг шууд хийхгүй бөгөөд зай талбайд зураг төслийн дагуу тохижилтын ажлуудыг хийхээр төлөвлөсөн байна.