Морь хүртэл бас л авлигаар уралдах уу?
Үндэсний их баяр наадмын хурдан морьдын уралдаан жилийн жилд хэрүүл маргаантай болдог байдал давтагдах шинжтэй. Өчигдөрхөн хурдан морины урьдчилсан хэмжилтээр морьдоо хэмжүүлсэн уяачид “хамгийн шударга шийдэл лазер метр” гэдгийг ам дэмжин ярьцгааж эхлэв.
Гэтэл хурдан морины хэмжилтийг технологийн дэвшилтэт лазер метрээр хэмжих үү, хүний гараар дэлэн дээрээс нь дарж хүссэн тоогоо бичих үү гэдэг дээр талцаж, уяачдын хөдөлмөрийг хэдхэн минутад үгүй хийх нь.
Уяач бүр л сойсон морио улсынхаа наадамд уралдуулахыг боддог учир шалгуур шаардлага тавьж, хязгаарлах нь зөв байх. Гэвч лазер хэмжилтэд итгэхгүйгээр цэргийн алба хааж буй хөвгүүдэд команд өгч дэлэн дээр нь өөр өөр даралтаар дарж хэмжихийг илүүд үзэж зүтгээд байгаа Хурдан морины салбар хорооны дарга, бригадын генерал Д.Ганхуяг, НЗДТГ-ын Цэргийн штабын дарга, Хурдан морины уралдаан зохион байгуулах ажлын хэсгийн ахлагч, хурандаа Г.Ялалт нар хэнд үйлчилж, гараа хүндрүүлэх гээд байгаа нь анхаарал татаж байна.
Монголчууд эртнээс морины босоо цагаан хийморь хэмээн бэлгэшээдэггүй бил үү? Гэвч тэр хийморийг нь албан тушаалаа ашиглан авлиглаар өөрсдийн танилуудад олгох магадлал өндөр болж байна.
Хэдхэн жилийн өмнө Батлан хамгаалах яамны Төрийн нарийн бичгийн дарга, Хурдан морины салбар комиссын дарга, генерал Х.Батбилэг өндөр нь тэнцэхгүй морьдыг уралдаанд гаргаж, авлига авсан байж болзошгүй хэмээн АТГ-д саатуулагдаж байсан гашуун түүхийг давтахгүй гэх баталгаа алга. Технологи хөгжсөн энэ үед нүдний хараагаа хүртэл лазераар сэргээж байхад нүдийг нь хутгаар зүсэж гараар оёно гэдэгтэй агаар нэг мэт зүйлс болж байна.
About Author
