СҮХБААТАР АЙМГИЙН НЭГДСЭН ЭМНЭЛГИЙН БАГ ГССҮТ-ӨӨС ТУРШЛАГА СУДАЛЛАА

Эрүүл мэндийн салбарын санхүүжилтийн шинэчлэлт болон лавлагаа шатлалын төвийн үйл ажиллагаатай танилцаж, туршлага судлах зорилгоор Сүхбаатар аймгийн нэгдсэн эмнэлгийн удирлага, эмч мэргэжилтнүүд энэ сарын 05-ны өдөр Гэмтэл согог судлалын үндэсний төвд ажиллалаа.
Энэ хүрээнд ГССҮТ-ийн захирал Э.Галбадрах орон нутагт хэрэгжүүлж буй осол гэмтлээс урьдчилан сэргийлэх төсөл хөтөлбөр, яаралтай тусламжийн чанар хүртээмж, эрүүл мэндийн байгууллагын гүйцэтгэлийн санхүүжилтийн талаар мэдээлэл өгч, арга туршлагаасаа хуваалцсан юм.
Түүнчлэн тус төвөөс цаашид Сүхбаатар аймгийн нэгдсэн эмнэлгийн эмч, эмнэлгийн мэргэжилтнүүдийг мэргэжил арга зүйгээр хангах, сэлгэн ажиллуулж чадавхижуулах, ажлын байрны болон танхимын сургалт зохион байгуулах, зөвлөн туслах чиглэлээр хамтран ажиллахаар боллоо.
Дашрамд дурдахад, 2022 оны 12 дугаар сараас эхлэн Хөвсгөл, Өмнөговь, Дорнод, Дорнговь, Говьсүмбэр аймаг болон сумын нэгдсэн эмнэлгийн удирдлагууд ГССҮТ-д Эрүүл мэндийн салбарын гүйцэтгэлийн санхүүжилтийн хэрэгжилтэнд тулгамдаж байгаа асуудлыг хэрхэн шийдвэрлэж байгаа талаар туршлага судалсан байна.