Допинг илэрсэн бөх Б сорьцын шинжилгээ хийлгэх хүсэлт гаргажээ

Үндэсний их баяр наадамд дөрөв давсан бөхчүүдийг допингийн шинжилгээнд хамруулдаг. Энэ жилийн наадамд 512 бөх барилдсанаас 32 нь допингийн шинжилгээнд хамрагджээ. Ингэхэд нэг бөхөөс допинг буюу сэргээшийн төрлийн бодис илэрсэн талаар өнгөрсөн сард Бөхийн салбар комисс мэдээлсэн. Допинг илэрсэн бөхийн нэрийг сорьцыг нь баталгаажуулж байж зарлана гэдгийг тухайн үед мэдэгдэж байв.

Тэгвэл допинг илэрсэн бөх Б сорьцын шинжилгээ хийлгэх хүсэлт гаргажээ.

Энэ талаар Бөхийн салбар хорооны дарга П.Сайнзориг “Энэ жилийн Үндэсний их баяр наадмын бөхийн барилдаанд шөвгөрсөн нэг бөхөөс допинг илэрсэн. Тухайн бөх нь Б сорьцын шинжилгээ хийлгэх хүсэлт гаргасан болно. Б сорьцын шинжилгээний хариуг ирэхээр албан ёсоор мэдээлнэ” гэжээ.

Допингийн А, Б сорьцыг зэрэг авдаг бөгөөд тамирчин А сорьцын шинжилгээний хариугаа хүлээн зөвшөөрөхгүй тохиолдолд Б сорьцоо нээгээд шинжлүүлэх боломжтой байдаг аж.