Н.Удаанжаргал Малайзад ямар хэрэг өдүүлчихэв?!

Нүүрсний хулгай, ялангуяа оффтейк гэрээтэй холбоотой асуудлын гол гэрч нь “Тавантолгой төмөр зам” компанийн гүйцэтгэх захирал асан Н.Удаанжаргал юм. Тэрбээр 2022 оны аравдугаар сард Солонгос руу томилолтоор явсан. Өнөөг хүртэл эргэж ирээгүй байна. Эзгүй хойгуур нь түүнийг үүрэгт ажлаас нь чөлөөлсөн. АТГ, ЦЕГ, ТЕГ-ын мөрдөгчдийн ажлын хэсгээс шалгаж, НПГ-аас эрүүгийн хэрэг үүсгэсэн. Улмаар “Шувуу” ажиллагааны хүрээнд эрэн сурвалжилж байгаа юм.

Анх эх орноосоо явсных нь дараахан “…Н.Удаанжаргал Солонгост байна, Сингапурт оччихжээ” гэсэн албан бус мэдээлэл яригдаж байв. Харин хууль хяналтынхан мөрдөн шалгаж, “Шувуу” ажиллагааны баг эрж сураад эхэлснээс хойш удалгүй 2023 оны дөрөвдүгээр сарын эхээр Аргентин улсад очсон нь тогтоогдсон. Ингээд Монголын Аргентины талтай яриа хэлэлцээр хийж байтал Н.Удаанжаргал зугтчихсан.

Удалгүй Тайландад очсон нь мэдэгдсэн. Тэндээсээ 2023 оны дөрөвдүгээр сарын 19-нд Малайз улсын хилээр орсон байдаг. Өөрөөр хэлбэл, түүнийг Малайзад байгааг тогтоосноос хойш бараг хоёр сарын хугацаа өнгөрлөө. Энэ хугацаанд Н.Удаанжаргалын пасспортыг хүчингүй болгож, түүн рүү мөнгө гуйвуулах үйл ажиллагааг зогсоосон талаар эх сурвалжууд мэдээлсэн. Хэд хоногийн өмнө, 2023 оны зургадугаар сарын 7-нд ХЗДХ-ийн сайд Х.Нямбаатар “…Н.Удаанжаргал Малайз улсад байгаа гэдэг мэдээлэл үндсэндээ батлагдсан. Хууль сахиулах байгууллагууд руу бичгээ хүргүүлээд, ажиллаж байна. Уг мэдээллийг энэ нөхөд маань ч бас сонсож байгаа. Гэм буруугийн асуудлыг бид шийдэхгүй.

Тиймээс хэргээ үнэн зөвөөр шийдүүлэх, өөрсдөө хүндрэл чирэгдэл учруулалгүйгээр шалгуулах нь хэн хэнийхээ ажлыг үрэхгүй байх сайн талтай” гэх мэдээллийг олон нийтэд өгсөн. Х.Нямбаатарын хэлснээс харахад Н.Удаанжаргалыг шууд бариад авчрах боломжгүй байгаа бололтой. Учир нь тэнд байгааг мэдээд хоёр сар болсон, бас “…Өөрөөр ирсэн нь өлзийтэй шүү” гэснээс тэгж дүгнэж болохоор байна.

Ядахад манай улс Малайзтай Эрх зүйн харилцан туслалцаа үзүүлэх гэрээ байдаггүй. Энэ нь Н.Удаанжаргалыг авчрахад саад болж байж мэдэх юм. Гэхдээ түүнийг “…Тэндхийн хуулиад тэнд нь шийдэх юм гэнэ лээ” гэсэн албан бус мэдээлэл яригдаад эхэлж байна. Хэрэв тэр үнэн бол Н.Удаанжаргал Малайзад ямар нэг өдүүлчихсэн байж таарна. Эсвэл тэр хүнийг энд авчирвал балрах хүмүүс тэнд нь “уях” арга хэмжээ авсан байж ч мэдэх юм. Удахгүй тодорхой болох биз ээ.

Б.ДАМДИН-ОЧИР

Эх сурвалж: “Зууны мэдээ” сонин