mnews.mn

   Урин дулааны улирал эхэлсэнтэй холбоотойгоор суррон, скүүтер, мопедын замбараагүй хэрэглээ, осол аваарыг бууруулах үүднээс Монгол Улсын Замын хөдөлгөөний дүрэм, Нийслэлийн Засаг даргын захирамжийн дагуу шат дараатай ажлуудыг хийж байна. Энэхүү зохицуулалтын хүрээнд 18 нас хүрээгүй тохиолдолд хүүхдэдээ суррон унуулахгүй, худалдан авч өгөхгүй байх талаар уриалж буй. Сүүлийн долоо хоногт энэ төрлийн тээврийн хэрэгсэлтэй холбоотойгоор 34 хүн гэмтэж бэртсэн байна.

Иймд Нийслэлийн ерөнхий боловсролын сургуулиудад “СУРРОНГҮЙ СУРГУУЛЬ” өдөрлөгийг хэрэгжүүлэхээр төлөвлөсөн бөгөөд өнөөдөр Шинэ Монгол Харүмафүжи сургуулиас дээрх уриалгыг дэмжиж “СУРРОНГҮЙ СУРГУУЛЬ” аяныг эхлүүллээ. Тус сургуулийн зүгээс ахлах ангийн сурагчдын ойлголтыг нэмэгдүүлэх үүднээс ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн хошууч Г.Отгонтамир, 7-р үеийн эцэг эхийн төлөөлөл Э.Мөнхтуяа нарыг зочноор урьж сурронтой холбоотой үүсэж болзошгүй аюулын талаар лекц тавьж, эцэг эхчүүдийн санаа бодлыг сонсож өргөн хүрээний өдөрлөгийг зохион байгууллаа.

Өдөрлөгийг нээж НИТХ-ын дарга бөгөөд Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн дарга А.Баяр “Өнөөдөр бид хүүхэд, багачуудынхаа аюулгүй орчинд сурч боловсрох эрхийг хамгаалах, замын хөдөлгөөний соёлыг төлөвшүүлэхийн төлөө “Сурронгүй сургууль” өдөрлөгийг Шинэ Монгол Харүмафүжи сургууль дээр эхлүүлж байна. Нийгэмд зөв үлгэр дуурайл, манлайллыг өөрсдөөсөө эхлүүлж буй “Шинэ Монгол Харүмафүжи” сургуулийнхандаа, Монголчуудын бидний бахархал болсон Их аварга Харүмафүжи  Д.Бямбадорж танд чин сэтгэлийн талархал дэвшүүлье. Сурагчдын аюулгүй байдал бол сургалтын чанараас дутахгүй чухал үнэт зүйл юм. Иймд сургуулийн орчинд эдгээр тээврийн хэрэгслийн хэрэглээг зохицуулах, хориглох бодлого хэрэгжүүлэх, урьдчилан сэргийлэх ажлыг идэвхжүүлэхийг бүх сургуулиудын удирдлагуудад уриалж байна.Мөн амин хайртай хүүхдэдээ амь эрсдэх зэвсэг бүү авч өгөөрэй  гэж эцэг эхчүүдээ уриалмаар байна” гэв.

“Шинэ Монгол Харүмафүжи” сургуулийн үүсгэн байгуулагч Д.Бямбадорж “Сурроны хэрэглээ сургуулиудын тулгамдсан асуудал байсан. Үүнийг төрийн байгууллагын зүгээс хуулиар албажиж, хүүхдүүдийг хамгаалж уриалга гаргаж байгаад талархаж байна. Эцэг хүний хувьд, сургуулийн үүсгэн байгуулагчийн хувьд эх орны минь ирээдүй болсон хүүхдийн амь нас, эрүүл мэндийг бодитойгоор хамгаалж, урьдчилан сэргийлэх боломжтой боллоо гэж харж байна. Манай сургууль дээр сурронтой ирсэн тохиолдолд түлхүүрийг нь хураан авч эцэг, эхчүүдэд нь хүлээлгэн өгдөг. Эрүүл энх, элэг бүтэн байна гэдэг хамгийн чухал” хэмээн сэтгэгдлээ хуваалцлаа.

Нийслэлийн боловсролын газрын дарга Б.Амартүвшин “СУРРОНГҮЙ СУРГУУЛЬ” аяныг нийслэлийн хэмжээнд хэрэгжүүлж, ерөнхий боловсролын сургуулиудад сурагч, эцэг эх, асран хамгаалагч, сургуулийн багш нар, цагдаагийн мэргэжилтнүүдийг хамарсан өдөрлөг зохион байгуулна гэдгийг онцоллоо.

Эх сурвалж: НИТХ-ХМОНХА

БНСУ-ын Пусан хотноо болж буй “Монгол кино өдөрлөг”-ийг говийн их дархан цаазат газар болон дэлхийн нэн ховор мазаалай баавгайн тухай өгүүлэх “Их говийн манаач” баримтат киногоор нээсэн билээ. Уг киноны Ерөнхий продюсероор Eguur News агентлаг, найруулагчаар Э.Ган-Очир нар өргөн бүрэлдэхүүнтэй ажиллаж, 2025 оны 12-р сард Монгол дахь нээлтээ хийсэн бол ийн анхны гадаад улс дахь нээлтээ хийж буй талаар Өмнөд Солонгосын хэвлэлүүдэд бичсэнийг орчуулан хүргэж байна.

2026 оны “Монгол кино өдөрлөг” энэ сарын 16-ны өдөр Пусан хотын Хэүндэ дүүрэг дэх “Кино ордон”-ы дунд танхимд албан ёсоор нээлтээ хийлээ. Нээлтийн үйл ажиллагаа “Их говийн манаач” баримтат киног үзэгчдэд толилуулснаар эхэлсэн юм.
Тус наадмыг Пусан хотын “Кино ордон”, Монголын Кино урлагийн зөвлөл болон “Ханнарэ” соёл урлагийн сан хамтран зохион байгуулж байна. 

Нээлтийн ёслолд Монгол Улсаас БНСУ-ын Пусан хотод суугаа Консул Ц.Жадамба, “Ханнарэ” соёлын сангийн тэргүүн Шим Сан, Пусаны кино ордны дарга Гу Ин Бом, Пусан хотын худалдаа, аж үйлдвэрлэлийн танхимын Ерөнхийлөгч Ян Жэ Сэн, Кино урлагийн зөвлөлийн гишүүн Д.Цэнгэл нар оролцож үг хэлжээ.

Зургийн эх сурвалж: Indifocus
Нээлтийн үг хэлсний дараа өдөрлөгт гарч буй кинонуудын трэйлерийг үзүүлж толилуулсан юм. Үүний дараа “Их говийн манаач” кино багийнхантай үзэгч, уран бүтээлчдийн уулзалт хийсэн байна. Уулзалтад найруулагч Э.Ган-Очир, продюсер Ж.Мядагбадам, Р.Болор нар оролцож, үзэгчидтэй чөлөөт яриа өрнүүллээ. Уулзалтыг “Киноны ордон”-ы ажилтан Жон Хэ Жин хөтлөн явуулсан юм.

Гурав дахь удаагийн Монгол кино өдөрлөгий нээлтийн бүтээлээр сонгогдсон “Их говийн манаач” баримтат кинонд говьд амьдардаг, дэлхийд нэн ховордсон мазаалай баавгайг хамгаалах болон байгалийн өвийг хадгалж үлдэх тухай өгүүлдэг.

Найруулагч Э.Ган-Очир “Манай киног үзэхээр ирсэн та бүхэнд чин сэтгэлээсээ талархаж байна. Дэлхий дээр маш цөөхөн үлдсэн мазаалай баавгайн тухай өгүүлэх энэхүү бүтээлийг Монголд гарсны дараа хоёр дахь удаагаа нээлтээ хийж та бүхэнд толилуулж байгаадаа баяртай байна” гэв.

Продюсер Ж.Мядагбадам “Миний бие энэ баримтат киноны Ерөнхий продюсороор ажилласан билээ. Говь нутаг бол миний төрөлх нутаг бөгөөд уг киноны найруулагчаар ажилласан миний дотны найз Э.Ган-Очирыг “Coach” киног өмнө нь үзэж байсны хувьд түүнийг говийн байгалийг хамгийн сайн буулгаж чадна гэдэгт итгэсэн учраас мазаалайн тухай киног хамтдаа эхлүүлэхээр зориг шулуудсан. 

Харин одоо 24 сарын турш бүтээсэн бидний кино Пусан дахь наадмын нээлтийн бүтээл боллоо. Найруулагч Э.Ган-Очир маань гэр бүлтэйгээ Солонгост ирсэн нь маш дурсгалтай үйл явдал болж байна. Сүүлийн үед Солонгос жуулчид говь нутгийг ихээр зорьж байгаад баярладаг. Энэхүү баримтат кинонд гарч буй говийн байгалийн дүр төрх нь сая сая жилийн өмнөх эх дэлхийн төрхтэй төстэй гэж эрдэмтэд хэлдэг” гэсэн юм.

Үүний дараа кино баг үзэгчдээс асуулт асуусан бөгөөд тэдний зүгээс мазаалай баавгайн түүхэн ач холбогдлын талаар их сонирхож байлаа. Нэгэн үзэгч “Та бүхэн зөвхөн кино бүтээгчид биш, харин говийн хамгаалагчид шиг санагдаж байна. Солонгос хүмүүс ч бас баавгайтай холбоотой түүх соёл ихтэй. Монголчууд мазаалайг хэрхэн үзэж, хүндэлж ирсэн бэ” гэж асуужээ.

Зургйин эх сурвалж: Монголын Үндэсний Кино Зөвлөл
Продюсер Ж.Мядагбадам “Говь нутаг Улаанбаатараас 1300 км хол оршдог. Мазаалай хүнээс, амьтдаас зайдуу, алслагдсан газарт амьдардаг учраас дэлхийд хамгийн ховордсон амьтдын нэг юм болов уу гэж боддог. Говь гэдэг нь монголоор “цөлөрхөг, эзгүй газар” гэсэн утгатай. Мазаалай баавгай байдаг гэдгийг анх 1960 онд дэлхий нийтэд танилцуулж байсан. Бид энэхүү ховор амьтныг дэлхий нийтэд таниулж, хамгаалахад дуу хоолойгоо өргөхийг зорьсоор байна” хэмээн хариулсан юм. Үзэгчид ч гэсэн мазаалайг хамгаалж, хүн төрөлхтний өв болгон үлдээхэд хүчин чармайлт гаргахыг тэр хүссэн юм.

Хөтлөгч Жон Хэ Жин “Говь бол Солонгосын хойгоос зургаа дахин том, асар уудам газар. Шар шороон шуурга болдог нэг шалтгаан нь Говийн цөлжилт байдаг тул энэ нь бидэнд ч бас хамаатай асуудал. Шимсан лам болон Хонгбөб хийдийнхэн Монголд мод тарих ажилд идэвхтэй оролцож байгааг дурдах нь зүйтэй байх” гэсэн байна. Уран бүтээлчид “Солонгосчууд Монголд мод тарьж байгаад маш их баярлаж байна. Энэ нь мазаалайг хамгаалахад том нөлөө үзүүлнэ. Киноноос та бүхэн байгаль хамгаалал болон усны ач холбогдлыг харсан байх. Энэ киног олон хүн үзээсэй гэж хүсэж байна” хэмээн онцолсон юм.

Продюсер Ж.Мядагбадам дараагийн бүтээлээрээ Говийн зэрлэг хавтгай тэмээний тухай баримтат кино хийхээр төлөвлөж байгаа гэдгээ мөн хуваалцлаа. Найруулагч Э.Ган-Очир үзэгчдийн дунд мазаалайн амьдрах орчны талаар асуулт асууж, зөв хариулсан хүнд бэлэг гардуулсан юм. Говь дундуур зам тавих асуудлын талаарх асуултад продюсер Ж.Мядагбадам “Шовийн дархан цаазат газар дундуур зам тавих нь байгалийн тэнцвэр алдагдах эрсдэлтэй тул кино уран бүтээлчдийн зүгээс мэдээж эсэргүүцэж байгаа. Кинонд ч бас зам тавихгүй байснаар байгаль амьсгална гэсэн санаа бий” гэсэн юм.

Энэ удаагийн наадмаар “Их говийн манаач” баримтат киноноос гадна “Эцэг”, “Хадмын ээж”, “Зүрхний” зэрэг дөрвөн киног мөн үзэгчдийн хүртээл болж буй юм.

Эх сурвалж: Indifocus

Эх сурвалж: ZUV.MN

Эрчим хүчний салбарынхан цалингаа нэмэгдүүлэхийг шаардаж, хоёрдахь өдрөө жагсаж байна.

Тодруулбал, ҮЭ-ийн холбооноос эрчим хүчний салбарын ажилтнуудын цалин хөлсийг нэмэгдүүлэх, нийгмийн баталгааг хангахад шаардлагатай хөрөнгийн эх үүсвэрийг шийдэхийг шаардсан жагсаалыг зохион байгуулж байгаа аж.

Жагсаалд ҮЭ-ийн холбооны гишүүн байгууллагууд болох Улаанбаатар хотод үйл ажиллагаа явуулж буй эрчим хүчний салбарын компаниудаас гадна Ховд, Дархан, Сэлэнгэ, Хөвсгөл, Дорноговь, Эрдэнэт, Булган, Архангай, Өвөрхангай аймгаас нийт 17 анхан шатны хорооны 320 гаруй гишүүд зорин ирж оролцож, төр засагт дуу хоолойгоо хүргэж байна.

Харин өнөөдөр уг жагсаал суулт хэлбэрээр Сүхбаатарын талбайд үргэлжилж байгаа бөгөөд салбарын төлөөлөгчид байр сууриа илэрхийлж, УИХ, Засгийн газарт шаардлага хүргүүлнэ гэлээ.