Урьдчилсан байдлаар гал түймэрт гурван хүн амь насаа алдаж, ГССҮТ-ийн салбар Түлэнхийн төвд 10 иргэн, Цэргийн төв эмнэлгийн хордлогын төвд нэг, Эх хүүхдийн эрүүл мэндийн төвд гурван хүүхэд хүргэгдэж, эмнэлгийн тусламж үйлчилгээ авч байна. Эмнэлэгт хэвтэн эмчлүүлж байгаа иргэдийн гурвынх нь бие маш хүнд байгааг эмч мэргэжилтнүүд мэдээлсэн. Түлэнхийн төвийн Эрчимт эмчилгээний тасагт цугларсан ар гэрийнхнээс зарим зүйлийг тодрууллаа.

Эрчимт эмчилгээний тасагт хэвтэн эмчлүүлж байгаа иргэний ар гэрийн төлөөлөл Д.Жаргал:

-Түлэнхийн төвийн Сэхээний тасагт авга ахын хүү, бага ахын хүү хоёр хэвтэн эмчлүүлж байна. Хоёулаа 40 нас гарсан хоёр сайхан залуу. Нэг дүүгийн маань хоёр нүд нь юм харахгүй, хоёр гар нь битүү түлэгдсэн. Нөгөө дүү маань 85 хувийн түлэгдэлттэй шокын байдалтай байна. Осол гарах үед нэг дүү маань дуудлагаар сантехникийн ажлаа хийж явсан бол нөгөө дүү маань гэр рүүгээ харихаар тэр хавьд явж байсан. Одоо хоёулаа Эрчимт эмчилгээний тасагт эмчилгээ хийж байна. Эмч нарын зүгээс “Хоёр дүүгийнх нь биеийн байдал хүнд байгаа. Зохих эмчилгээг шуурхай хийж байна” гэсэн.

Бид шөнө ослын талаар мэдээлэл авсан. Гэхдээ арай ч манай хамаатан садан галд өртөнө гэж санасангүй.

Бид өглөө 04.00 цагт эмнэлэг дээр ирсэн. Одоо ар гэрийнхнийхэн бүгдээрээ цуглараад байна. Нэг эгч маань хөдөөнөөс дуудагдаад ирж яваа. Өөрсдөөс нь шалтгаалалгүйгээр нэг дүү маань ажлаа хийж байгаад, нөгөөх нь гэр рүүгээ харьж яваад гэнэт осолд өртөж, эрүүл мэндээрээ хохирлоо гэсэн юм.

About Author

mnews2

See author's posts